موقف ... خنقني !!!
عندي موضوعات كتير قوي عايزة اكتبها من فترة طوووووويلة
انا نفسي زهقت من نفسي
بس فيه موقف حصلي من كام يوم زود الخنقة دي !!
موقف ... مش عارفة اوصفه ازاي ...
كان عندي يوميها شغل ما ... و كنت نازلة الصبح لابسة عباية و ايشارب كبير و كحلي على اسود
حتى ماما علقت اني مغمقاها قوي ...
المهم اني اكيد يعني ماكنش فية شيء ملفت
و انا راجعة البيت من الكلية ... و يادوب قادرة ابص قدامي ... و عايزة اوصل بيتنا بأي طريقة ...
رحت اركب حاجة عشان اروح ...
عادي يعني ... بعد ما ركبت كنت اول واحدة في الميكروباص و لسة حاركب ... و كان واقف لسة حيركب اتنين مع بعض ... واضح انهم زمايل في الشغل
المهم لقيت واحد فيهم مهتم قوي ... و اتفضلي يا انسة ... و ايه الذوق ده كله !!!
قلت عادي ... واحد ذوق مفيش مشاكل !!!
المهم قعدت ورا شوية ...
لقيت الراجل ده و هو شاب على فكرة جاي يقعد جنبي ... و الح الحاحاً حاراً اصراراً شديداً يعني انه يقعد في الكرسي اللي جنبي ... حتى زميله اللي كان معاه اتخانق معاه و زعقوا مع بعض ... لأنهم كان معاهم شنط و حاجات و كان عايزه يقعد جنبه على الكنبة اللي قدام عشان يحطوا الحاجات قدامهم ... و الراجل مصر انه مابيحبش يقعد على الكنبة اللي قدام دي ...
قلت يا واد طنش خاااالص ... يمكن الراجل مش بيحب يقعد قدام فعلاً ... عاتشي يعني ...
المهم طول الطريق عماله يكلم صاحبه اللي قاعد قدام بصوت عالي ... و يحكي عن اهميته في العمل و انجازاته و ازاي ممكن يوقف شغل مش عارفة مين كله لو عايز و كلام كدة ...
قلت يا واد طنش خاااااالص ... شاب و فرحان بنفسه شوية ...
و انا اصلا ماكنش فية دماغ اركز مع حد ...
المهم ان هو و صاحبه كانوا كل شوية بيكلموا ناس من اللي معاهم في الشغل على الموبايل ... و يبقى بيتكلم مع الراجل ذوق جدا و باحترام ... و بعد ما يقفل يقعد يتكلم عنه بطريقة وحشة ... او يقول كلام مش ظريف
احتقرته بيني و بين نفسي
بس قلت يا واد طنش خاااالص ... خليني في اللي انا فيه ...
و طنشت ...
المهم انه كان نازل قبلي ...
جم ينزلوا لاحظت إن الراجل حط ايه في جيبه و عمل حركة غريبة كدة ...
على ما نزلوا
و انا استوعبت
بابص على رجلي .... لقيت حضرته راميلي الكرت بتاعه !!!!
انا بلمت لمدة مش عارفاها بالظبط ...
بجد بلمت من غير اي رد فعلا خالص ...
و بعدين قلت انا اعمل ايه دلوقتي ؟؟ اقطعه و لا ارميه و لا ايه ؟؟
بابص في الكارت لقيت الراجل ده اسمه محمد عبد الهادي ...
استجحرمت ارميه عشان فيه اسم من اسماء الله الحسنى و اسم الرسول صلى الله عليه و سلم ...
فقلت اخده و اتصرف فيه في البيت .....
ماكنش عندي وقت افكر اصلاً لأني كنت نازلة بعدها على طول ...
بس انا مش عارفة اوصف احساسي كان ايه ...
تصرف ... حقير ... فعلاً ...
و كنت حاسة تجاه الشخص ده بالقرف و الاشمئزاز !!!
بجد تصرف حقير جداً جداً ...
أمال لو ماكنتش شايفني لابسة ازاي و عاملة ايه ؟؟
هو متخيل كدة اني ممكن استلطفه يعني و اتصل بيه ؟؟
تفكير ... مش عايزة اوصف يعني ...
لما روحت البيت وريت الكارت لماما و قلت لها على الموضوع ...
الرغيب بقى إن ماما محتفظة بالكارت ... يظهر ناوية تشتغل الراجل ده و لا ايه مش عارفة ؟؟!!!
المهم انا بعدها فكرت و لمت نفسي ... لأن ممكن لو حد من اللي كانوا راكبين كان شافني اني ماسيبتش الكارت يقول بقى ادي المحجبات و مش عارفة ايه ...
بس انا ساعتها ماعرفتش اتصرف ازاي !!!
عشان كدة اتخنقت من نفسي اكتر !!
اللهم لا تجعلنا فتنة للناس ...
مش عارفة اوصف شعوري تجاه الشخص ده !!! لو قدامي دلوقتي كنت ... و لا بلاش !!!
خلاص بقى
الاشتراك في:
تعليقات الرسالة (Atom)
42 comments:
بارك الله فى حضرتك
وحفظك
واشكرك على سؤالك عنى
طول ما انت عايشة حتشوفي أنواع الأمراض خليك صلبة ولا يستخفنك هؤلاء القوم
انما ما قلتيش الأستذ محمد ده بيشتغل فين ونمرته كام
وبعدين فيه ناس بيتوفر فيها قدر من الحماقة كبي وده لو فوايد أن تعري نعمة العقل
يا بنتى
اللى يعيش ياما يشوف
في مواقف اغبي و اغبي .. و اغبى من كده
فكى يا بنتى
اللى يشوف بلاوى الناس ..!!
ما شاء الله جميل
في منهم كتير هتشوفيهم في كل مكان
بس دي مش حاجه تخنق ولا حاجه
لأن انتي ممكن تعتبري ده ابتلاء فعلا
و المواقف الكتيرة فعلا بتعلم الواحد
ان شاء الله ردك يكون اكثر حنكة لو اتكرر الموضوع
عموما ده عهدنا بيكم دايما
ربنا يوفقكم يارب
سلام
تصرف حقير مقرف وقح جـــــدا
..
ربنا يكون في عونك
..
بس فعلا هوا بيشتغل ايه ونمرته كام
..
لا حول ولا قوة الا بالله
بجد والله ربنا يعينكم انا مش عارف بتقدروا ازاى تعيشوا مع ناس زى دى انا لو مكانكم كنت كرهت البلد باللى فيها بجد فعلا فيه شباب كتير اوى زودوها بشكل مبالغ فيه وملهمش ابدا اى عذر خصوصا ان حضرتك ملتزمة بالزى الشرعى سبحان الله ربنا يثبتك ويعينك
و لا تتخنقي و لا حاجة يا ستي .. الواحد كل يوم بيتعلم حاجة في الدنيا ..لكن الاكيد .. انه مابيتعلمش ببلاش
و اذا كان علي محمد عبد الهادي .. و لا يهمك .. اديلنا بس بياناته .. و المرة الجاية حتلاقيه هو اللي بيلم الاجرة في الميكروباص ..
زادك الله خلقا و تقوي ..
و بالتوفيق
العريان وراء القضبان
شاركنا فى حملة التضامن مع الدكتور عصام العريان
على مدونتى
بصراحة غلطتى لما خدتى الكارت
المفروض كنتى تنفضى وتعملى ولا خدتى بالك ويا سلام لو كنت دستى على طرف الكارت كدة كأنك مش واخدة بالك
بس عموما انتى لو ليك اخ المفروض يظبطه بالتليفون بقى لحد ما يطهق عشان ما يعملش كدة تانى :D
لا حول ولا قوة الا بالله:(
بجد الواحد خلاص هيسبلهم البلد
الله المستعان بجد... بس عارفة اول ما
عمل كدة قبل ما ينزل ... يابشمهندس فى حاجة وقعت منك (وبصه تناحة)
الله يهديهم
بصراحه موقف زباله
انا اسف بس الواحد مش متصور الناس دي بتفكر ازاي
على العموم كويس اني ماكنتش موجود وشفت الموقف علشان انا للاسف باحكم بالمظاهر
ايوة
وبعدين ياجماعه كل اللي يعرف حد اسمه محمد عبدالهادي يقولوه عيب كده
اهو هانعمل فتنه ف البلد عشان خاطرك
so bad
انا مش عارف امسك نفسي
so so bad
انا فاهم رد فعلك
س عموما ولا يهمك موقف وبيعدي
ممكن خدمة: رقم تليفونه
واوعدك مش هشتغله كتير بس للاسف هيه حاجه انا بحبها انى اشتغل خلق الله
بصراحة انا مش عاررف أقول لحضرتك ايه
....
المجتمع مليان من الأمثال دى
..
بس أنا عندى فكرة
..
إنتى تحطى رقم موبايله هنا ف التدوينة
..
و ستيبى الباقى على إخوانك و أخواتك المدونيين
و طنش ياواااد
موقف خنيق صحيح.. بس ولا يهمك يا عسل.. البلد مليانة من الصنف ده.. واللى يعيش يا ما يشوف.. واليومين دول الولاد فرحانة بشبابها قوى.. وفى ناس مبالغ فيهم.. ده انسان ميستهلش حتى ان انت تفكرى تضايقى منه
smile b2y 3shan 5atry
يا دكتوره انا مره واحد اتصل بيا
بيقلى انتى اطياف
طبعا بلمت
ده اسمى على النت
واحد بيعاكس و عارفه كمان
بقله ليه بتسأل قالى بس اصله عاجبنى
قلتله طيب كويس
تيت تيت تيت تيت
و كبرت فى دماغى و كنت هفتح موضوع فى شمساوى و اكتب فى الرقم
و بعدين ناس قلتلى بلاش فطنشت
و هو بطل بتصل
مش عارف انا ايه ده ... هما الشباب دول مش بيتكسفوا ... ده انا باتكسف لما الاقى واحده جمبى قاعده فى الميكروباص ... باتنقل من نفسى على كرسى تانى ... مش عارف الناس دى مش بتختشى ... مش عارفين ان دول اولاد ناس محترمين ... وهو لو عنده بنت خالته كده ولا اخته ياخى يرضالها كده ... ربنا يهديهم ...
-----
وعلى راى محمد الانصارى وجمعاوى ... حطى نمرته واخوانك هيشتغلوه ... ههههه ... وهنشتغله اعلى شغل ...
:+|=:|
هوا المرور هنا واقف ليه ..عجلة قدام ياسطا ..
بص ياعيلة أنت باين من كلامك أنك أول مرة تنزلى الشارع ، يابنتى ده نص اللى فى الشارع زى الشخص اللى قابلتيه ومش محتاج أقولك على اللى بيحصل فى اماكن كتير فى مصر وبنفس الطريقة اللى حصلت معاكى ، بس لازم تعرفى أن الشعب المصرى مستواه الاخلاقى تدنى غلى أبعد مستوى ومن الآخر المفروض نشوفلنا بلد غير دى نعيش فيها ، البلد دى مش بتاعتنا ، ده حتى الغلابة فيها طمعانين فى بعض .
واحد قرب يموت من الغيظ
حزيــــــن
العفو على ايه
حضرتك اخ فاضل ... لازم نطمئن على حضرتك
باشمهندس عصفور المدينة
فعلاً حضرك عندك حق
نعمة العقل
هو بيشتغل كيميائي في شركة ملابس
يلا مش مشكلة ... المسامح كريم
أطياف
فكيت يا بنتي
مع إن ...
و لا بلاش
يلا
باشمهندس عبد الرحمن
مش عارفة
الواحد ساعتها كان مرتبك
و زي ماقلت
انا تنحت
و بلمت شوية
على ما استوعبت الموقف اصلا
بس رأيك بجد انها مش حاجة تخنق ؟؟
باشمهندس بلال
ما قلنا المسامح كريم
ماتكبروهاش في دماغي يا جدعان
أستاذنا إمام الجيل
ماعندناش اختيار
مع الاسف موضوع المعاكسات ده بقى في كل حتة
و بقت اشكالها مختلفة
و بنات كتير بيبقوا محتشمات بل و حتى منتقبات بيتعرضوا برضة للمضايقة
الأستاذ غير معرف
ههههههههه
ما انا عارفة ورايا رجالة !!!
جزاكم الله خيراً جميعاً
أستاذ ياسر سليم
حاضر جاية إن شاء الله
باشمهندس عمرو فكري
في البداية ازاي حضرتك طبعاً ؟؟ ماشفناش حضرتك بقالنا كتير
: D
انا مش عارفة
انا كنت مش مستوعبة الموقف ساعتها
المشكلة كمان اني لقيت الكارت على رجلي !!!
يعني حتى مش جنبي
الراجل كان محترف التنشين و لا ايه مش عارفة !!
صح فكرة ... اخلي اخويا يظبطه !!
عشان يتعلم يحترم نفسه بعد كدة
حرة
هههههههههه
جامدة يا بنتي
فعلاً حركة جامدة قوي
بس ماجتش في بالي ساعتها
يلا
اهو الواحد بيتعلم
ولو
ما هي دي المشكلة
الحكم بالمظاهر
عشان كدة انا اتضايقت من نفسي قوي بعدها !!!
باشمهندس محمد الأنصاري
ما قلت ماتكبروهاش في دماغي !!!
انا عيلة و اعملها !!!
جمعاوي روش طحن
انا مش عارفة ليه المجتمع بقى مليان من الاشكال دي ؟؟
يعني ايه اللي اتغير قوي كدة بحس إن كتير من الشباب بقوا يتعبروا المعاكسة حق مكتسب حتى لو البنت محترمة ؟؟
كنت ناوية اكتب بوست عن موضوع المعاكسات ده
ميرو
حاضر يا قمري
بس اكيد لازم نشوف صرفة في الاشكال دي
أطياف
هههه
لأ ده الموضوع كبير
طب ممكن يكون جاب النمرة منين !!!
عمرو سلامة
جزاك الله خيراً كثيراً
فعلاً الحياء بقى مفتقد عند كثير من الناس
و التصرف اللي حضرتك بتعمله ده انا بحترمه جداً
موضوع التليفون ده حافكر فيه جدياً يقى مادام كدة !!!
عشان يبقى يحرم !!!
باشمهندس عبد الحرحمن
و باشمهندس بلال
جيت اهة !!!
خلاص خلصنا شغل تقريبا
و قاعدة على طول
ماحدش يبقى يشتكي بقى !!!
حافرغ كل اللي عندي من الفترة اللي فاتت
الأستاذ مجهول اللي قرب يموت من الغيظ
حمد لله على السلامة
يا رب تكون بخير
بانزل الشارع كتير
و كتير بنتعرض لمضايقات
زي ما قلت
بقى فيه شباب بيعتبروه حق مكتسب
إنما الموقف ده استفزني قوي
يمكن عشان جديد علية
و يمكن عشان احتقرته قوي
مش عارفة
ربنا يحفظنا
الواحد فعلا لسانه بيتعقد و بيتصدم فى المواقف اللى زى دى
عشان عامل المفاجأة
المجتمع مليان شخصيات زبالة و حقيرة
الموقف اللى حصل لك مش غريب
الغريب بقى انك تلاقى انسان كويس فى الدنيا الغريبة دى
جيداء
يا هلا
نورتي البيت
انا عارفة النظرة السوداوية اللي عندك فمش حتكلم على التعميم
: D
بس صدقيني لسة فيه ناس كويسين
لا حول و لا قوة إلا بالله
ياما هتشوفي كتير
بجد الناس ليه مش بتراعي ربنا
حسبي الله و نعم الوكيل
ربنا يحفظك يا رب
:)
انا هقولك على حاجه ، لما تنزلى الشارع وتلاقى حد بيبص عليكى قوى وكأنه عايز يفترسك لأزم نعرفى أن الشخص ده مريض نفسيا وعنده نقص ، فمتخدبش فى بالك بس لازم تبصيله بصه تنم عن الاحتقار ، بس معلهش أنتى ممكن تكونى جميلة لدرجة أن محدش ينفع مايبصش عليكى لأننا كلنا مرضى أو غير بنحب الجمال بس برضه النظرة لازم تكون بأحترام .
انا مت من الغيظ
هى فعلا حاجة...مش نضيفة
قبل كده حصلت لى واللى عمل كده كان مدرس كمان (جامعة أو مدرسة مش عارفة) وهو كمان كان عارف إنى مدرسة بس حسيت بإهانة شديدة، الله يخرب بيت الرجالة اللى مش محترمة نفسها والبنات اللى بتدى الانطباع إن البنات كلهم صايعين زيهم
إرسال تعليق