چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

توتة السحلوفة







السلام عليكم و رحمة الله و بركاته




تاني صور حيوانات !!
يلا مش مشكلة

أصل كان عندنا مشكلة صغنطوطة شوية في العيلة

اصل زمااااااااااااان اختكم كان عندها سلحفة

و بعدين ماما قرفت منها

عشان محتاجة حد يتابعها في أكلها و شربها و ياخد باله منها

و ساعات كنا بننساها

و ماما كانت بتستحرم


المهم خلصنا منها ... اديناها لبنت خالي الصغيرة


شوية و بنت خالي قرفت منها برضة ....

راحت خلصت منها

اديتها لبنت خالي التاني

البنت دي كامان قرفت منها


و مش عارفين نعمل ايه في السلحفة الصراحة ؟؟

طب ركزوا معايا كدة

مواصافاتها :

لسة شباب خالص ... أقل من ميت سنة كدة

تجيد النوم و الأكل

كسولة ... و عادة ردود أفعالها على المواقف بطيئة جدا

لما الناس تبقى صاحية و بتشتغل عادة تلاقيها مختفية ... و ممكن تقوم كل شوية كدة تعمل نفسها بتتمشى و تاخد لفتين في البلكونة ... بتعمل منظر يعني مش اكتر

عادة مالهاش أي لازمة في البيت ... بالعكس ... ده احنا بنخاف منها لما بتفكر تتحرك و لا تاخد أي موقف لأنها عادة بتسبب مشاكل ... زي مثلاً إنك تلاقيها محشورة ورا باب البكونة ... أو تتنزق في الشيش و تبقى صدفتها حتتكسر ... المهم احنا بنحبها ساكتة كدة ... عشان لما بتفكر الحقيقة الوضع بيبقى مش لطيف

تقريبا مالهاش اصحاب ... يعني اللي بيجيبلها الأكل يمكن يكون الوحيد اللي ليه علاقة بيها

اخر و اهم صفة ... بنحاول نخلص منها ... لكن مفيش فايدة ...

المهم بعد بحث و تفحيص و تمحيص ...

و بعد التفكير في الصفات اللي فوق دي

قلت يا جنين تديها لمين ؟؟ تديها لمين ؟؟

و في الاخر

قررت إن السحلوفة توتة حتبقى هدية ظريفة قوي لعمو حسني ......

و لا ايه رأيكم ؟؟


20 comments:

ftataljanna يقول...

ازيك يا عيله

انتى اسمك جنين ؟

فعلا؟

اسمك جميل على فكرة

اما عن السحلوفة فمش مشكلة اديها لاى حد عايزة تطلعى عينه :)

اما عن البوست اللى فات فما علقتش كان النت فاصل

انا محمد الأنصاري يقول...

ليه بقى كده
طيب والسلحفة ذنبها ايه
تظلميها ليه
ايوه انتى هتظلميها كده
ده انتى كمان ممكن تدخلى النار
انتى مش عارف قصة المراة اللى حبسة قطة فدخلت بسببها النار

نصيحة : يا ريت تفكري في حل تاني

حلم واحدة بتحب البلد دي يقول...

حرام عليكي يا مفترية

وتهون عليكي العشرة

هتسيبيها لعمو حسني

وقلبك طاوعك

ههههههه

هاتبرع واستضيفها انا عندي
بس عمو حسني لا
حرام عليكي
دي روح برضة

ههههههه

غير معرف يقول...

اول حاجه ازيك وعامله ايه وأيه الاخبار ..

من الاخر انا شايف بما انكم عائلة قرفانة من السلاحف فانا متفق معاكى انك تديها هدية لحسنى بس فى مشكلة ان السلحفاة عمرها طويل وممكن حسنى يتلكك ويقول انا مش هسيب الحكم الا لما السلحفاة تموت وتبقى دى مصيبة انتى عارفة ده عيل وبيشبط فى أى حاجه ..
واحد قرب يموت من الغيظ

اسلام رفاعى يقول...

عذرا للتحليق خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن طلاب الاسكندرية المختطفين
التفاصيل بمدونتى

other_things يقول...

عادة مالهاش أي لازمة في البيت ... بالعكس ... ده احنا بنخاف منها لما بتفكر تتحرك و لا تاخد أي موقف لأنها عادة بتسبب مشاكل ... زي مثلاً إنك تلاقيها محشورة ورا باب البكونة ... أو تتنزق في الشيش و تبقى صدفتها حتتكسر ... المهم احنا بنحبها ساكتة كدة ... عشان لما بتفكر الحقيقة الوضع بيبقى مش لطيف

...
اخر و اهم صفة ... بنحاول نخلص منها ... لكن مفيش فايدة
..
الكلام دا يودي بلد في داهية أختي
..
أنا ماليش دعوة بالمدونة دي خالص
..
وأطالب بحذف تعليقاتي جميعا
..

بس بس نو يقول...


أحم

انا جيت

عايز ترجيب من نوع خاث

بصي بقى انا مش هعلق بأسمى

طبعا أنا غنية عن التعريف و كفايه أنك عارفانى

بالنسه للانسه توته

لو للدرجادى منبوذه اعملوا فيها زى ما عملنا فى جوز الهانم

ولا عزاء لجمعية حئوء الحوان

أنا كتبت التعليق ده و انا بفأر ..

كل ده علشان مدخديش الوش اللى هنا
:P

ممكن احتاجه فى حفله تنكرية و لا حاجه

يلا تصبحى على ملايه

امام الجيل يقول...

جنين
عمو حسنى امممممممم
كده هنطمع الراجل اكتر يقولها هنشوف مين فينا هيعيش اكتر
لا هاخدها انا احسن

چـِنين ...عيلة و عايزة افهم يقول...

فتاة لجنة

إزيك يا عسولة وحشاني

احم احم

لأ انا اسمي جنين كدة و كدة

حابقى اقولك اسمي بعدين

بس انا باحب الاسم ده قوي

لو جبت بنت إن شاء الله حاسميها جنين

سحلوفة بقى

ما انا بقول نديها لعمو حسني !!

چـِنين ...عيلة و عايزة افهم يقول...

الأستاذ محمد الأنصاري


شكلك مابتحبش عمو حسني !!!

مستخسرين فيه سحلوفة صغيرة زي توتة

ما هو واخد البلد كلها ... جت على توتة يعني !!!

چـِنين ...عيلة و عايزة افهم يقول...

ماروووو

يا بنتي انتي مش فاهمة

توتة حتدلع بقى و تروح تعيش في القصر

و مش بعيد تطلع في التليفزيون

سلحفة مصر الأولى

هييييييييييه

چـِنين ...عيلة و عايزة افهم يقول...

الأستاذ مجهول اللي قرب يموت م الغيظ


هههههههههههه


أضحك الله سنك

دي تبقى مشكلة

على العموم انا مش قلقانة

كدة كدة احتمال كبير ولاد توتة يبقوا عند عمو حسني برضة

چـِنين ...عيلة و عايزة افهم يقول...

باشمهندس بلال

اقول لحضرتك على حاجة

كل واحد و اللي في قلبه

انا عن نفسي باتكلم عن توتة

ماليش دعوة

و بعدين التعليقات المبعوتة لا ترد و لا تستبدل

و لا تحذف

و الاي بي بتاعكم في الحفظ و الصون

و الوضع كله تحت السيطرة

مفيش قلق خالص

چـِنين ...عيلة و عايزة افهم يقول...

اطياف المتخفية

منبوذة

توتة بتتهان يا جدعان

لا لا لا

كله إلا الاهانة

و بعدين بلاش اتكلم عن جوز الهانم

عيب اللي انتوا عملتوه ده يا جدعان

باقولك ايه
دي مدونة نظيفة
خليني ساكتة بقى

شقاوة شعب يقول...

بصراحة عندك حق فى كل كلمة قلتيها

السلاحف دى دمها تقيل ورخمة قوى وبتفهم ببطء وبتعمل كل حاجة ببطء
وبتجيب العصبى لصاحبها

انا رأييى برضه تديها لعمو حسنى

AbdElRaHmaN Ayyash يقول...

ههههههههههههههههه
ربنا يعينها هناك
انا متأكد ان السحلوفه بتاعتك دي هتلاقي مكان تنافس فيه حد على البطء و التقل و ضعف الفهم و بطء البديهة في قصر الرئاسة

چـِنين ...عيلة و عايزة افهم يقول...

شيمو شقاوة شعب

ادي الناس اللي بتفهم

احنا ببنظر للمستقبل ... للعبوووور

چـِنين ...عيلة و عايزة افهم يقول...

باشمهندس عبد الرحمن

هههههههه

اهي دي المنافسة الشريفة

عصفور المدينة يقول...

كنا بنفكر نجيب واحدة ياشيخة خوفتيني
يعني حيبقى في البيت كمان

چـِنين ...عيلة و عايزة افهم يقول...

أستاذنا عصفور المدينة

حضرتك لو عايز اي حاجة فيها نشاط و حركة يبقى ده مش الاختيار خالص

هي اكبر ميزة فيها انها إلى حد كبير غير قابلة للكسر

يعني لو فيه عيال صغيرة من النوعية اللي بتشوط و تعصر و تعض دي ... الواحد يبقى متطمن عليها خالص