چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

سياسة البيض : مقلي و لا مسلوق ؟؟



حوار كدة مع نفسي برضة زي الأخ إمام الجيل
حاجة لاحظتها في نفسي اليومين اللي فاتوا دول

بقالي كام يوم كدة من ساعة ما بدأت اتحرك من بيتنا شوية في الاجازة دي مابدخلش على النت كتير
و لما بداخل مش باعمل شيء جدي
و ساعات باحس إن لو سبت نفسي شوية على النت حاهيس خلاص
انا عموما مقتنعة اني كبنت لازم يكون لية حدود في كلامي على النت عشان ماسمحش لحد يتجاوز في كلامه معايا
لدرجة كانوا يمكن في بعض المنتديات بيعتبروني الشاويش عطية و لا حاجة

بس اليومين اللي فاتوا دول كنت سايبة نفسي على طبيعتي شوية ... على اعتبار إن انا اصلا في حياتي باهزر كتير مع صاحباتي

و في المقابل عندي شغل كتير فعلاً كان المفروض يخلص على الكمبيوتر و ماعملتوش ...

موضوعات و بوستات و حاجات كان المفروض تتكتب و تصميمات كان المفروض تتعمل و شرايط كان المفروض تتفرغ ... و انا مطنشة و لا كأن ورايا حاجة

و بادخل اعمل اي شيء بشرط انه يكون غير جدي ...

مش عارفة مالي

يمكن عشان ضغط الشغل و انا لسة خارجة من امتحانات فبيحصل تفريغ عكسي
أو يمكن عشان انا زعلانة قوي ... و مقهورة قوي قوي
أو يمكن لأن بالي مشغول جدا بكذا قرار مصيري المفروض اخدهم الفترة دي و مأجلاهم ... فمش عايزة اشغل دماغي اكتر من كدة ( باعملها كتير الحركة دي )

مش عارفة

بس انا مستغرباني قوي

و في نفس الوقت كارهاني في اسلوبي ده ....
خصوصا اني كدة حاتبهدل قريب لما الحاجات دي كلها تتكوم اكتر ....

و تبعاً لتسلسل الأفكار ده بيخليني اتكلم في موضوع تاني

بما إن الانسان لازم يواجه نفسه بعيوبه
و بما إني جربت قبل كدة أحل عيوبي لوحدي وفشلت

فقلت أشارككم معايا

مش ناقصة فضايح على النت بس مش مشكلة

انا عندي عيبين قاتلين ربما هما سبب كتير من المشاكل اللي انا فيها

أول حاجة اني كسلية شويتين تلاتة اربعة ... خصوصا في شغلي
تاني حاجة اني فوضوية في حياتي ... و خصوصا في تضييع وقتي

و مش حاقولكم على محاضرات التنمية البشرية و الكورسات و و و

الكلام انا عارفاه

المشكلة في التنفيييييييذ


انا كنت متفقة مع اتنيمتي اننا حنخلي الصيف ده صيف للتربية

يعني كنا متفقين ان الصيف ده يبقى حاجة فارقة في حياتنا نطلع منه متربيين صح و حياتنا مختلفة

و مانكرش ان لحد دلوقتي فيه بوادر تربية ما .... بس في الايام اللي بانزل فيها بس .... فعلا باتربى الايام دي

الايام اللي باقعد فيها رغم إنها قليلة بس نفسي بتنتقم فيها مني ... و باهمل مسئولياتي و بتبقى زيطة

و كمان باسوق فيها

يعني يوم امبارح كان عندي خروج و حصلت ظروف و المشوار اتلغى ... رحت سوقت فيها بقى و قولت النهاردة كمان مش حانزل و مانزلتش ... باستعبط على نفسي يعني


نفسي يبقى عندي همة و تفاني في شغلي ... اسوق نفسي مش هية اللي تسوقني ... و ماسيبش حالتي المزاجية تحكمني ...

مش عارفة انا كتبت الكلام ده ليه ... بس شوية فضفضة كدة ... يمكن الاقي الحل عندكم
...


29 comments:

sokoothansawat يقول...

حاسة بيكي قوي في الكلمتين الجامدين دول...اصل انا ملكة الناس الي تطنش ووراها بلاوي كتير...شوفي هي مالهاش حل..لما تلاقي المسؤلية بتزنق...هتضطرى غصب عنك تعملي الي وراكي..للأسف يا اختي العزيزة...احنا اصلنا شعب بتاع اخر لحظة..مش بتوع التخطيط لقدام...ربنا معاكي في الأزمة دي..وتخلصي الي وراكي على خيرر

صاحب البوابــة يقول...

اتمنى أن يوفقك الله

تحياتي

Diyaa' يقول...

أنا حسيت مسألة الشاويش دي من أستاذ ضياء برضه :))
المهم نيجي لفضفضتك وسياسة البيض
كنتي بتكتبي مستعجلة وخليتيني أخمن كتير...أخطاء املائية بقي
موضوع تسوقي نفسك...ومش هيا اللي تسوقك...فعلاً..انتي وصاحبتك فكرتوا صح
بس
حاجة من اتنين
يا صاحبتك عايزة اللي يساعدها وبالتالي معرفتش تكمل الجزء اللي ناقص فيكي وهو الكسل عند التنفيذ

يا إما إنتي مأيوس منك..يعني لو وقفنا كلنا تحت باب البيت نقولك انزلي روحي الشغل وملكيش مزاج مش هتنزلي :$



عموماً ..عندي نصيحتين أكيد مش هتمانعي في قرايتهم
واحد- يا ريتنا كلنا نخلي ربنا رقيبنا في شغلنا وحياتنا..مش ننساه أبداً ..ساعتها مش هيكون لينا عين نكسل أو نقصر...

تاني حاجة...يبقي في أهداف صغيرة تحطيها كده..يعني حطي لنفسك أهداف يومية في الشغل ...وأكتبيها في ورقة وألزقيها أدامك علي المراية مثلاً أو أي حاجة بتتابعيها كل يوم...بحيث إنك تفتكري الهدف ده كل شوية ويا ريت يبقي ريمايندر موبايل كمان..عارفة ؟ كوني لحوحة علي نفسك..وهتقدري تسوقيها ...بس متخليش أي حاجة تحبطك لأني محبط وبالتالي ده موضوع تاني خالص...بس عموماً ..أنسيني لأني موضوع تاني ...يا رب كلامي يكون فيه مساعدة ليكي ...وكلام كل الناس اللي هتعلق
وربنا معاكي
سلام عليكم

ولــــــــــو يقول...

انا بصراحه مش عندي حل ليكي عشان بصراحه وانا باقرا الكلام بتاعك كنت شايف نفسي ف شاشه الكومبيوتر وبالتالي انا اناشد كل اللي يقرا البوست بتاعك وعنده الحل مايترددش انه يقول
مش عشانك لوحدك
عشاني انا كمان
ربنا يوفقك وتلاقي حل
اصل بصراحه انا تعبت

belal يقول...

أفضل المسلوق


......
عندي نصيحة كويسة لحضرتك بالنسبة للشغل اللي مابيخلص

لا تؤجل عمل اليوم إلي الغد ..ولا تعمله اليوم

وكبش تعيش
.......

mariam يقول...

المشكله فى التنفيذ فعلا
مش عارفه اقدم لك حل
لأنى يمكن بعانى من نفس المشكله
و خصوصا الكسل و تضييع الوقت
لما تلاقى حل قولى لى عليه

تحياتى

غير معرف يقول...

بإعتبارك عيلة ولازم تفهم ، ليه متحاوليش تحددى انتى عايزة تعملى أيه بالضبط وترتبى الحاجات اللى انتى عاوزة تعمليها فى ورقة صغيرة _ على اساس انه مفيش ورق _ حسب اهميتهم وتبداى تخلصى حاجه ورا حاجه _ يعنى هى مش مشكلة يعنى _ وبعدين انتى يمكن سنك صغير والالتزام صعب بالنسبة ليكى فى الوقت خصوصا انك بتقولى عندك شغل يعنى مشغولة بحاجات كان ممكن تبقى مشغولة بيها بعدين وعلى العموم انتى شكللك طيبة ونفسك تعملى حاجه فى مصر اللى محدش بيعمل فيها حاجه من الاساس الا الانتخة والتطنيش ...
واحد هيموت من الغيظ ومن مصر ومن الصيف ...

مدونه انا بحبك يا مصر يقول...

لا انتى لستى شويش انا كل الموضوع شيفه انه اى اسان محتاج انى ربنا يوفقه فى حياته
اتمنى أن يوفقك الله
احمد الجيزاوى

علي يقول...

انتي صحيح ممكن تكوني عايزة تفهمي
لكن انتي مش عيلة ابدا

Caaaaat يقول...

حبيبتى ..

ربنا يفرج كربك وييسرلك الخير

ftataljanna يقول...

لا بصي يا بنتى

انتى مالكيش حل ايه ده

انا قريت كل المدونة دلوقتى مرة واحدة كده

يا خبر ابيض ايه الدماغ دى :)

كويس كويس

بصي انا اول لما لقيتك بتتكلمى فى السياسة قلت اهلا تبقى اخوان

بعد كده لقيتك بتنفى قلت اهلا

مشكوك فى امرها زى حالاتى
ههههههه

اصل كل اللى يتكلم فى السياسة ولا يقول اختى فى الله فى البلد دى يبقى اخوان

ياللا ما علينا

هاضيفك عندى يا قطة اوك

واستنينى هنا كتير

يا رب نبقى اصحاب


اه قبل ما انسي انا بقى بخاف اتكلم فى السياسة

جبانه

بس مش اوى بتكلم فى السياسات الخارجية بس
:)

انما اللى جوه فزى ما قلتى البلد امنا وخايفه على مصلحتنا

وهو انت هاتعرف احسن من الحكومة يا هانى

:)

الى حد ما حاسه ان سياسة عمر بن عبد العزيز هى الافضل ابدأ باصلاح الدين تنصلح الدنيا

اما بقى عن الفوضوية وتضييع الوقت فانا زيك كده بس بحاول اتغير يعني واخده قرار جدى ان اللى جاى مش هايبقى زى اللى فات والا هانستبدل وطبعا احنا مش عايزين كده
ربنا يرحمنا

سلام يا قمر

ftataljanna يقول...

سؤال واتمنى تجاوبى عليه
انتى بتدرسي ايه ده بدايو لانك قلتى انك مش بتحبى المجال اللى انتى فيه

اما نهاية انتى كررتى كلمة شغل اكتر من مرة
انتى بتشتغلى

وايه ؟

noosy right

حشرية يعني

:)

امام الجيل يقول...

اما عن موضوع شاويش فانا اؤيده بشدة لان النت للاسف الكلام فيه بيجر واذا البنت زادت شوية حتى لو كانت ملتزمة فده بيجر الشاب حتى لو كان ملتزم
ثانيا مش عارف بقى ارد واقول ايه دى نفس مشاكلى اعمل ايه بس طبعا نقول ايه الوضع المثالى فى هذه الحالة كما قال لى عصفور المدينة ادخلوا عليهم الباب اى المبادرة والشروع فى العمل من الجميل ان الواحد يعرف اخطاؤه ومن الاجمل انه يعترف بيها لان ده اول طريق للحل بس الاهم انه يبتدى بقى هنستنى ايه مفيش حلول بتيجى من السما ودى دنيا يعنى دار اختبار يعنى هو ده الصراع اللى بجد ومفيش حلول سحرية بتيجى بس ربنا زين لينا الجنة وكره النار لينا عشان يساعدنا فى الوصول للهدف وهكذا اى عيب تلاقيه فى نفسك اكيد تعرفى ايه اضراره وايه توابعه كمان فانصحك بالمبادرة هنستنى ايه

محمد النجار يقول...

بارك الله فى وقتك فهذه افضل نعمة لانشعر بها

تحياتى

اسلام رفاعى يقول...

جميل الحوار مع النفس لانه بيساعد على تعديل مسار حاجات كتير
............................
سعيد بزيارة مدونتك اتمنى انك تشرفينى فى مدونتى

عيلة و عايزة افهم يقول...

سكوت حنصوت

حلو قوي

احنا نعمل حزب بقى

ممكن نسميه ( حزب المطنشون في الأرض )

المشكلة إن الواحد لما بيتزنق فعلاً بينجز ... بس اكيد مش بنفس الجودة

و حاجات كتير قوي بتتكروت

عيلة و عايزة افهم يقول...

صاحب البوابة

و أسأل الله التوفيق لك أيضاً و للمسلمين جميعا

عيلة و عايزة افهم يقول...

الأستاذ ضياء

يا دي عذاب الضمير

خلاص صلحت الأخطاء نزولا على رغبة الجماهير


بالنسبة للنصيحتين

جزاك الله خيراً كثيراً

فعلاً النصيحة الأولى دي كانت بتتعبني كتير قيام الدراسة

كنت باقول لو مت دلوقتي حيبقى وضعي ازاي بالتقصير اللي انا فيه ده كله

النصيحة التانية بعملها بس لما باوصل لل ( dead line (

يعني يبقى خلاص
now or never

عيلة و عايزة افهم يقول...

و لو

مرحباً بك في حزب المطنشون في الأرض

عيلة و عايزة افهم يقول...

الباشمهنس بلال

كنت أتمنى إنك تقول مقلي

عموماً ... اختلاف الرأي لا يفسد للود قضية

منكم نستفيد يا أستاذنا

عيلة و عايزة افهم يقول...

مريم

احنا كدة مش حيكفينا حزب ... احنا محتاجين تنظيم

اوبا

عيلة و عايزة افهم يقول...

الأخ المجهول اللي حيموت من الغيظ

حضرتك عندك حق

و يمكن فعلا عامل السن ليه وضعه

بس بجد الواحد بيشوف ناس أصغر منه كمان بيشعر بالخجل قدامهم قوي

عيلة و عايزة افهم يقول...

أستاذ احمد الجيزاوي

أسأل الله أن يوفقنا جميعاً

سعيدة جداً بمرورك و تعليقك

عيلة و عايزة افهم يقول...

الأستاذ علي

ربنا يكرمك

و حزاك الله خيراً على المرور و التعليق

عيلة و عايزة افهم يقول...

كااااااااات


اّمين يا رب

: )

عيلة و عايزة افهم يقول...

فتاة الجنة

إيه ده كله إيه ده كله


خلاص احنا ممكن نعمل برضة حزب المشكوك في أمرهم

و انتي مش حشرية و لا حاجة بالعكس


أنا بادرس طب

و هو مش شغل بمعنى شغل
هو حاجت تبع المستشفيات و الكلام ده
تقدري تقولي تدريب يعني
بالإضافة لشوية حاجات تطوعية
و حبة حباشتكانات و اشتغالات تانية

ليه بقى

زي ما قلتلك

يمكن هدف من أهدافي التربية

و عشان ماحبش برضة ابقى فاضية قوي

عقلي بيشت شوية من الفضا

عيلة و عايزة افهم يقول...

الأستاذ إمام الجيل

جزاك الله خيراً

كلامك رائع بجد

انا فعلا مش عارفة مستنية ايه

ساعات لما بيبقى عندي مشكلة مش باحب اشتكي
لأني ساعات باحس إن موضوع الشكوى ده نفسي بتضحك علية بيه

يعني نفسي بتسكتني شوية
و تقولي اديكي بتسألي هو و بتدوري على حل
نوع من التنويم كدة لتخفيف الشعور بالذنب

المشكلة إن الواحد مع نفسه في سجال

يغلبها مرة و تغلبه مرات

و ساعات باتخيل برضة زي مالأستاذ مجهول اللي هيموت من الغيظ قال ... إن عامل السن برضة ليه وضعه
و ان يمكن الفترة دي من سماتها شوية التقلب
انا مش حاسة ان انا مراهقة يعني
بس حاسة إني لسة مش مستقرة بدرجة كبيرة

مش عارفة ده بجد و لا نفسي بتضحك علية برضة

الله المستعان

عيلة و عايزة افهم يقول...

الأستاذ محمد النجار

اّمين

و فعلا لا أستشعر هذه النعمة إلا عندما أفتقدها

عيلة و عايزة افهم يقول...

الأستاذ إسلام رفاعي

فعلاً عندك حق

و أسأل الله أن يجعلها توبة و بداية تصحيح

تشرفت بزيارتك