چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

كله زي بعضه على فكرة

السلام عليكم و رحمة الله و بركاته

في البداية أحب أقول إني ماكنتش عايزة أكتب حاجة عن السياسة دلوقتي خالص
لسببين

أولهم إن المدونة دي مش مدونة سياسية ... دي مدونة شخصية عاملاها لأي حاجة تيجي في دماغي عايزة أقولها ... و أنا حاسة إن معظمها كان سياسي فانا مش عايزاها تاخد الصبغة
دي

تانيهم بقى إن المفروض لسة راجعة من رحلة عمرة يعني اكتب حاجة هادئة كدة مبشرة للنفس
بس أعمل ايه ؟؟
اعمل فيه ايه يعني ؟؟
هو مين ؟؟

الولد ده اللي معرفش اسمه ...

ولد مين ؟؟
الولد اللي ساب الطواف كله و احنا في العمرة و جه هو و مامته يمشوا ورايا و انا باطوف
و بعدين في عز الطواف و الناس عمالة تدعي و تلبي ألاقي صوت مصري ورايا : هما بيفتحوها يا ماما ؟؟ ( قصده على الكعبة )

و بعدين راح رادد على نفسه : بيفتحوها ... أكيد بيفتحوها لأي رئيس بيجي ...
و راح مكمل في لهجة تأكيدية وثقة تماماً تماماً : فتحوها لحسني مبارك ( على اعتبار إن ده الرئيس الوحيد اللي هو يعرفه اصلاً ! )
بصراحة مش عارفة اقول يعني كنت عايزة اعمل ايه يعني ساعتها ... يعني انت سايب الطواف كله و ماشي ورايا انا عشان تفكرني بحسني مبارك يا اخي !!!
ما لفت نظري أكثر بقى رد والدته التي ما أن أنهى جملته الاخيرة حتى ردت في نبرة وجلة نعرفها جيداً : مالناش دعوة بحد !!
حتى في هذا المكان و في هذه الساعة مازال كثير من الشعب يحتفظ بخوفه الذي يبدو أنه أصبح طبيعياً يتلقاه منذ الطفولة من مجرد ذكر اسم الأنظمة !!

قلت أخلص عمرتي و اشيل الموضوع ده من دماغي ... لكن بعد ما خلصت العمرة و بما إني يعني سماوية و قلبي لون الخروب فضلت تطاردني الفكرة إني أدور ... هما فعلاً فتحوها لحسني مبارك ؟؟


و لما رجعت بقى طاوعت فكري الشرير و ماكدبتش خبر ...
ساعتها لقيت بقى صورة الرئيس المشهورة و هو نازل من الكعبة لما و معاه بعض السياسيين و الوزرا التانيين ( بصراحة ماعرفش مين دول لأني مش قديمة قوي كدة )
و على فكرة الصورة دي قديمة من أيام ما كان لسة نائب للسادات لأنه ماعتمرش و لا حج من ساعة ما بقى رئيس ... يعني لما دخل الكعبة ما كنش لسة رئيس أصلاً ...



المهم الموضوع ده رجع لفكري ذكرى قديمة شوية بالتحديد لسنة 2004 لما كانت رئيسة جمهورية أندونسيا ميجاواتي سوكارنو رايحة تعمل عمرة و معاها وفد مرافق ...
المهم ساعتها تم السماح لها بالدخول للمسجد النبوي و الوقوف أمام قبر النبي صلى الله عليه و سلم للسلام عليه ... رغم إن السلطات السعودية أصلاً مانعة زيارة النبي صلى الله عليه و سلم للنساء على اعتبار انهم بياخدوا بالرأي إن زيارة النساء للقبور محرمة ...

بصراحة ساعتها تعجبت جداً من هذه السياسية ... يعني ايه يعني ؟؟ إذا كانت السلطة ترى إن زيارة النساء للقبور حرام فماكنش المفروض يدخلوها حتى لو كانت رئيسة جمهورية و مايجاملوش على حساب قناعاتهم الدينية ... و إن كانت ترى أنها حلال فالناس سواسية كأسنان المشط و لا فضل لعربي على أعجمي إلا بالتقوى ... يعني يبقى الموضوع على الكل ...

و صورة تانية على الجانب الاّخر هي صورة القائد الماليزي مهاتير محمد و هو في الإحرام في وسط فوج زيه زي أي واحد تاني من غير حراسة و لا وفد مرافق و لا و لا ...

الفكرة اللي عايزة أوصلها في الاّخر هية إني عايزة أوجه رسالة للقيادات العربية اللي بتدعو لعدم خلط الدين بالسياسة ( مش عارفة إيه الفكرة دي !!! ) إن مادام هية فكرتها كدة ماتحاولش بقى تاخد امتيازات دينية في الدنيا نتيجة لمواقعهم و مناصبهم السياسية ... و لا ايه ؟؟

انتهى كلامي

و على فكرة أنا مش إخوان عشان محدش ياخد كلامي على أي محمل




30 comments:

ولــــــــــو يقول...

العيال الصغيره دي مشكله
بيقولوا اللي على لسانهم بدون تفكير او عمل حساب للتوابع يابختهم
ثانيا للاسف السياسه تدخلت في كل حاجه حوالينا حتى الدين بيحاولوا يطلعوا بفتاوى تخدم مصالحهم الشخصيه
السياسه يا عزيزتي يجب الا يكون لها علاقه بالدين والا سصبح الوضع كما هو عليه الان
ناس بتستغل كل شيئ بتملكه او تديره لخدمه اغراضها السياسيه
معلش هي دي السياسه
ربطك بين المواضيع كان اكتر من رائع واسلوبك جميل جدا
تحياتي

انا اول تعليق
yes i made it

علاء يقول...

ولو ان كان نفسي تطلعي اخوان
:)
و متفهميش غلط مش معنى كده ان الاخوان احسن من غيرهم و لا حاجة :)

بس عموما انا متهيألي ان مبارك حج بعد ما بقى رئيس
هاتأكد من الموضوعده و ابقى أقول

بس طبعا مش عدل أبدا
لان بيت ربنا مفيهوش تفرقة بين صغير و لا كبير
و لا رئيس و لا غفير
حسبنا الله و نعم الوكيل
حاجة تغيظ و الله

ض/خالد يقول...

عادي يعني
أنا لو حجيت
هبقى في وسط عامة الشعب

mo'men mohamed يقول...

يا ستى هو حد قالك انك أخوان
متخافيش
المهم
اصل دلوقتى بقى الدين و الشريعة بتتشكل على مزاج أصحاب السلطة
يعنى فتوى تفصيل
وكلام لا حول ولا قوة الا بالله ما انزل الله به من سلطان

حسبى الله ونعم الوكيل
السلام عليكم

بحب الحرية يقول...

عمرة مقبولة ..

على فكرة حسني مبارك دا لما بيدخل المسجد يصلي العيد ..
الواحد بيبص وبقول لا حول ولا قوة إلا بالله..لإني على طول من شكلهم بفتكر الآيه "ومن أظلم ممن منع مساجد الله وسعى في خرابها إلا أن يدخلوها خائفين" وربنا يرحمنا برحتمه ..


وكل عمرة وإنت طيبة :D

belal يقول...

اه..أنا برضك زي دكتور خالد ...عادي يعني..مع عامة الشعب..زي بابا حسني

الطائر الحزين يقول...

ان حكمة الحج والعمرة

هى عدم التفرقة
الزى الواحد والمناسك الواحدة والمشقة الواحدة

لكن تقولى لمين وتعيدى لمين
لينا رب اسمة الكريم

تحياتى

عمر الشرقاوى يقول...

هههههههه
الضحكه دى على حديث الواد و امه
هههههه
الضجكه دى عشان الريس حج ولا محجش دى مجرد القاب
هههههههههه
الضحكه دى عشان انتى قلتى فى الاخر انى مش اخوان مع ان مقالك ناجح وممتاز وكان كل شى ناجح لازم ننسبو للاخوان والله دا شىء كويس جدا ان النجاح ديما بيفكرنا بالاخوان
هههههههههههه
الضحكه دى غلاسه

امام الجيل يقول...

بس ايه العيلة دى شكلها كده مخبرة وكانت عايزة توقعك انا عارف الحركات دى ده مخبر متنكر فى زى عيلة صوغننة حتى فى العمرة يا ربى يلا بقى
بس طبعا صحيح اللى عنده مقتنعات دينية ما لازم يحافظ عليها مهما كانت الظروف وميجاملش حد على حساب دينه اكيد
تحياتى

AbdElRaHmaN Ayyash يقول...

:D:D
أختي الكبيرة عيلة و عاوزه تفهمي
ممكن افهم وجهة نظرك عن المحمل اللي كلامك يتاخد عليه لو انتي اخوان
المهم
كلامك عن فصل الدين عن السياسة مظبوط
خصوصا ان السياسة جزء من الدين
و الاخ ولو
رأيه ان الوضع الحالي سيء لان الدين دخل في السياسة :)
لأ .. الوضع الحالي سيء لأن الدين مدخلش في السياسة يا مسيو
دي نقطة
النقطة التانية اني اعتقد اني زي دكتور خالد
لو عملت عمره تاني همشي مع عامة الشعب

Monzer يقول...

انت مش اخوان
انت من اعداء النظام
لا ومش النظام ده وكل الانظمة السلطوية المخربة والحاجات ده :)))

أنا تعجبت كثيرا من موقف الدولة التى تسمى نفسها السعودية
ما هي أصلا اشترت البلد لحسابها سمت بلد الحرمين باسم الأسرة بتاعتها
تعمل الى هي عاوزاه باه

كل حاجدة لعبة فى ايديهم مع الأسف

تحياتى

علاء يقول...

لا لا لا
انا مش مصدق
ضاكتوور خالد هيبقى في عامة الشعب
ازاي ؟
احنا اقل واجب نجيبله بساط طاير او طيارة تلف بيه حوالين الكعبة
اصل الناس مقامات
ههههههههههههه

و الله حسني مبارك ده غلبان
فاهم الموضوع غلط
و ساعة ما هيعرف الحقيقة الصح
هيكون الوقت فات
و بيجهزوله مكانه في جهنم
استر علينا يارب
و لا تفتنا قبل الممات
و ارزقنا الثبات عند السؤال
آمين

عيلة و عايزة افهم يقول...

و لو

ماتفكرنيش بموضوع الفتاوى ده ما انا كنت ساكتة !!!
بس انا رأيي إن السياسة يجب أن تكون لها علاقة بالدين و ليس العكس
يعني ايه
يعني الدين يؤثر على السياسة لارساء قيم العدل و أسس الحكم الإسلامي

إنما السياسة لا يجب أن تؤثر على الدين بأي حال من الاحوال

ماينفعش

عيلة و عايزة افهم يقول...

باشمهندس علاء

ماشي ياباشمهندس
: )
فاهماك على فكرة
و انا كنت كتبت عند اية الفقي قبل كدة ليه انا مش اخوان ... في البوست التانياللي هية كانت عاملاه عن الاخوان

المهم المرجعية الإسلامية

و فعلاً فعلاً حاجة تغيظ
بس تقول لمين ؟؟

عيلة و عايزة افهم يقول...

الضاكتور خالد و ثنائي الهندسة

ده التواضع ده !!!

لأ لأ مش ممكن

ده المفروض عامة الشعب يقدر لكم الموضوع يا جماعة
و ننزل صوركم في الجرايد بقى
زي صورة الريس و هو يحاور طفلة صغيرة .. الريس و هو يربت على كتف مواطن مصري غلبان و الكلام ده

بس اقتراح الباشمهندس علاء حلو
ماله البساط الطاير ؟؟

عيلة و عايزة افهم يقول...

اه صحيح نسيت حاجة
ربنا يكرمك يا باشمهندس بلال
ماتقولش على حسني ... بابا

عيلة و عايزة افهم يقول...

الطائر الحزين

بالظبط

نفس الزي و نفس المناسك

بس للي يفهم

عيلة و عايزة افهم يقول...

الأستاذ مؤمن

لا مش خوف و لا حاجة
بس عشان ماحدش يفتكر إني كاتبة كدة عشان أي هدف

أنا كاتبة كدة كواحدة مسلمة عادية

انا مش عارفة ازاي الشيوخ اللي بيعملوا كدة يقبلوا على نفسهم كدة مهما كان السبب

عيلة و عايزة افهم يقول...

بحب الحرية

الله يكرمك

تصدقي انا بيجلي نفس الخاطرة بس عشان الاية فيها تهديد و وعيد جامد باخاف اكون بافكر في الراجل بتجني زيادة
ربنا يهدينا و يهديه

عيلة و عايزة افهم يقول...

الأستاذ عمر الشرقاوي

بغض النظر عن الضحكة الغلاسة

ماكنش قصدي اقول اني مش اخوان عشان كدة ... بس عشان ماحدش يقول اني كاتبة البوست لأي هدف

بس على رأيك .. كويس برضة

وضح إن الجملة الاخيرة دي عملت مشكلة للناس ... اشيلها و لا ايه ؟

عيلة و عايزة افهم يقول...

الأستاذ امام الجيل

ضحكتني اضحك الله سنك

:D

مخبر متنكر في شكل عيلة

ربنا يعافينا

عيلة و عايزة افهم يقول...

أخويا الصغير الباشمهندس عبد الرحمن

: D

زي ماقلت
المفروض التأثير يجب من جانب واحد
تأثير الدين في السياسة
و ليس العكس
دي وجهة نظري

عيلة و عايزة افهم يقول...

الأستاذ منذر

مش البلد بس

انا بيضايقني كمان مثلاً إنهم مسمين من أبواب الحرم على أسامي الأسرة المالكة

ازاي يعني ؟؟

قالوا لي عشان نهو الي بناها
طب ما هو بناها بفلوس الدولة هو بناها من جيبه ؟؟

نـــــــور يقول...

البوست رائع جدا.. سلمت يمناكِ
وحمدا لله على سلامتك من العمرة
وعمرة مقبولة إن شاء الله :)

عيلة و عايزة افهم يقول...

الله يسلمك

و ربنا يرزقك بعمرة قريبة يا نور

belal يقول...

بابا حسني
بابا حسني
بابا حسني
بابا حسني
بابا حسني
بابا حسني
بابا حسني
بابا حسني
بابا حسني
بابا حسني
بابا حسني
بابا حسني
...
أي خدمة
...
انا مش بقبل أي وصاية خارجية

غير معرف يقول...

انتى لخصتى مشكلة البلد كلها فى قصتك البسيطة دى ، والمشكلة هى ان كل الجيل اللى طالع ده شارب من أهله الخوف من النظام ومبارك ورجالته العنتبلية ، بس مش عارف جايز نتغير أنا عندى أمل لأنى ناوى أربى أولادى على الثورة والصراخ فى وش أى حد ممكن يفكر مش يخد حقهم زى اللى ربنا يخده .............حد أقرب يموت من الغيظ

عيلة و عايزة افهم يقول...

باشمهندس بلال

ماشي يا باشمهندس

طب اعمل حساب للأخوة برضة


ده حتى ماقلتليش حمد لله على السلامة يا ابلة !!!

عيلة و عايزة افهم يقول...

المجهول اللي قرب يموت من الغيظ

ما هو ده الامل

الامل ان طالع إلى حد كبير شباب عنده وعي و فكر
فحتى لو مقدرش يغير دلوقتي فحتكون مسئوليته يربي جيل جديد يكون عدده أكبر و يجي على ايديه التغيير إن شاء الله

غير معرف يقول...

يا عيلة المفروض اننا نتحرك من دلوقتى لحد امتى هنفضل سكتين ومبلمين على الاوضاع دى ، لازم تعرفى اننا نستاهل اللى بيجرالنا لاننا سكتين على كل اللى بيحصل دون اى إعتراض ، مننا على العموم انا اعتقد ان التغيير هيكون على ايدى ولا عندك راى تانى ههههههههه .
واحد أقرب هيموت من الغيظ .........