چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

مش تغطية خالص ....


مش تغطية خالص ...

البداية
يوم الاربعاء رحت مؤتمر المدونين في نقابة الصحفيين ...
المؤتمر كان قبليه وقفة تضامنية ... بس انا ملحقتهاش لظروف كتير قوي يرجع أغلبها إلى السطل يعني ... لأني أصلاً كنت فاكرة المؤتمر الخميس ( عادي عدوها لسة ماخلصتش امتحانات ) ... و بصراحة بصراحة كمان ... انا اصلا ماكنتش اعرف ان فيه وقفة عشان باكروت في القراية ( امتحانات برضة عدوها تاني )


المهم اكتشفت الساعة ستة و نص إن المؤتمر كمان ساعة ... و على ما لبست و نزلت ... و ربنا يباركلها صفا صاحبتي اللي اتفقنا نروح نتوه سوا ... لأنها اكنت اول مرة نروح نقابة الصحفيين ....
طبعا بما إن انا منضبطة جدا جدا يعني في مواعيدي لطعت البنت فترة ... بصراحة مش قليلة يعني ... كان المؤتمر اكيد بدأ ... و بعد ما اتقابلنا و السلام و الكلام بدأت رحلة التوهان بقى ... و اللي بصراحة بصراحة اوجه شكري لقوات الامن الكريمة انها اختصرت لنا الرحلة دي جامد لما لقينا عربيات الامن المركزي واقفة على اول الشارع و قدام النقابة و كانت دليلنا للمكان ... فعلا فعلا الشرطة في خدمة الشعب ...


أختكم كانت رايحة بقى و ناوية تعمل تغطية و بتاع ... و واخدة معايا الكاميرا و الورق و حانشتغل ... بس عملت زي الاستاذ علاء بالظبط ... و كسلت بقى و كملت القعدة مع البنات ... بس مانكرش برضة اني حاولت اصور شوية ... بس بما اني ضليعة في التصوير ( شوفتوا ضليعة دي ) كنت متأكدة ان الكاميرا حتخذلني ... و بعد كام لقطة و شوية تسجيل فيديو رفضت تمام تتجاوب معايا او تحط اي منطق ... قلت مش مشكلة اجرب الموبايل حبيبي اللي مش عارفة ليه كان عندي احساس برضة كدة مش عارفة جالي منين انه برضة حيخذلني ... بعد كام صورة لقيت الاخ حيفصل شحن ... قلت خلاص كفاية علية اسجل صوتي ... و فعلا اكن مفيد لأن فيه حاجات كتير في الكلمات اللي اتقالت لفتت نظري ... بس لسة مافيضتهوش ... ( ملحوظة لنفسي : ابقي اتعلمي التصوير بقى و كفاية فضايح )




اول واحدة قابلتها هناك كانت مروة ... بنت لذيذة جداً ... كان نفسي أصورك مع الكانز ( المكاتعة ) اللي عليه صور هيفا : D عشان تبقى فضيحتك على المدونات اسبوع ... بس ارجع و اقول برضة هية مالهاش ذنب دي كانت معزومة عليه ( يلا يا ست حاعديها المرة دي )
كان فيه صحفية من إسلام اون لاين بتعمل تحقيق عن المدونات البناتيتي ... بعد ما مشيت جه في دماغي خاطر ملح جداً اني اعرفها او قابلتها قبل كدة ... بس صفا قالت لي بطلي تهيؤات :D
شوفت برضة بنات فريق عشرينات ... و كانت من اجمل مقابلات اليوم ...و قابلت برضة بناتيت كتير مدونات حابقى اتكلم عنهم بعدين ان شاء الله ....
كان نفسي اقابل مريم مخرفة المعادي ... بس ماكنتش عارفة هية جاية و لا لأ ... و بذكائي ماكنتش اخدت منها نمرة الموبايل ...
بما غن دي مش تغطية اصلا فمش حاتكلم عن الكلمات اللي اتقالت ...
لفت نظري بس في كلمة الأستاذ شريف لما اتكلم عن عدد المدونات الرهيب في العالم خصوصا في دول زي كوريا الجنوبية و إيران ... و إزاي إن من أشهر المدونين الرئيس الايراني احمدي نجاد ... كدة يبقى فيه امل نبقى رؤساء في يوم من الايام ... ما تيئسوش يا رجالة ....


رغم كل شيء كانت تجربة حلوة و روحت بذكريات جميلة ...



ملحوظة : كنت عايزة أنقلكم المقاطع و الصور اللي عندي على الكاميرا ... بس الحكاية كملت و مالقتش الكابل ...
فكرت اسرق صور من المدونات التانية بس قلت على ايه ما التغطيات كلها حتلاقوها هنا عند الاستاذ علاء ....
بس

7 comments:

oOo_Mariam_oOo يقول...

بتهرجي..أنا كمان كنت هناك بس مشيت على طوووووووووول مشيت الساعة 9:15 تقريبا... كان فعلا يوم جميل

علاء يقول...

:)
ربنا يبارك فيكي
ليه مش تغطية خالص :)

هي تغطية بس من نوع خااص

و إيه حكاية المكاتعة اليوم ده
أنا كمان للأسف اتعزمت على ميراندا
بس و الله كنت باشربها و انا متضرر

و المفروض الواحد يتأكد من عدة الصحافة قبل ما ينزل يغطي الحدث :)
بس لكي عذرك عشان الموضوع جه فجأة على غير المتوقع

بس كان نفسي تقوليلي أسماء أكتر للمدونات اللي حضروا عشان الحصر اللي أنا بأعمله

و بالنسبة لكلمة الدكتور شريف بصراحة كانت أقيم كلمة و أثراها بالمعلومات

و الواضح ما شاء الله إن مريم تخاريف المعادي لها شعبية جامدة لأني كل ما أعدي من جنب بنات أسمعهم بيسألوا هي تخاريف المعادي مجتش و لا إيه
ربنا يوفق

اللي مش تغطية خاالص دي جميلة جدا بأه على فكرة
ربنا يحميكي :)

النجمة الصامدة يقول...

تغطية لذيذة والله
يارب المرة الجاية ابقى معاكم يارب
خير

طيب بمناسبة اني هنا
اتفضلي الدعوة دي

تسرنا دعوتكم لزيارة مدونة بناتيت
www.banateet.blogspot.com

oOo_Mariam_oOo يقول...

مريم تخاريف من المعادي !!! ايه يا علاء ده أنا كنت فلكرة ان أبويا اسمه عمران :):):):... ربنا يخليكي أنا لا مشهورة و لا حاجة... أنا غعلا كنت هناك بس ماحدش جالي و سأل انتي مريم ليه :(:(:(:( عشان اتفشخر بنفسي...هههههههههه... خير خير انشاء الله

ولا ايه يا ستنا ؟؟

عيلة و عايزة افهم يقول...

مريم

أها
يبقى انتي بقى من الناس اللي كانوا عاملين دوشة برة :D
باقولك ايه ... المرة الجاية مفيش حركة خطوة من غيري إعلام مسبق ... و إلا ..

أستاذنا علاء

مش عافرة ده كان يوم مكاتعة المكاتعة العالمي و لا ايه
إنما حلوة عدة دي ... حسيت كأني حلاق ...

معظم أسماء المدونات موجودين مع مروة حلم الحرية لأني ماكنتش باكتب مع الاسف كنت باتعرف بس هية تقريبا كانت بتكتب كل حاجة المدونة و الايميل و الاسم و رقم التليفون .. يعني م الاخر لو مروة التقفشت كلنا حنروح في الرجلين

النجمة الصاعدة
مدونتك عسولة قوي ... حابقى اجي عندكم كتير

AbdElRaHmaN Ayyash يقول...

هي مش تغطية
بس اهي حاجه و خلاص
المؤتمر فعلا كان جميل
حضرت متأخر بس اهه لحقنا حاجه
و ان شاء الله تتكرر على خير

عيلة و عايزة افهم يقول...

مرحبا بك في حزب المتأخرين !!!

يا رب نجتمع على خير تاني قريب و يبقى احسن من كدة كمان