((( بـــــــانــــــورامــــــا )))
صحيح
فاكرة
في في المدرسة جولنا و قالوا هيعملوا رحلة
ساعتها بجد كانت فكرة معتبرة و مستاهلة
و قالوا نزور بانوراما
نشوف النصر
بداية حلم بيزين معالم مصر
ساعتها فرحت
قلت هاشوف حكاوي الحرب من جدي
و اشوف الجندي بيكبر و بيعدي
و ألمس فرحته بيدي
و كان اليوم
و رحت بشوق بيملا القلب
و لكن بعد ما اتفرجت و اهتميت
كرهت الحرب
ملتني بخوف
و شفت الرعب
كرهت السلك و الأشواك
و دم و ضرب
رجعت يوميها باعشق لون سحابة سلم عدت فوق سطوح بيتنا
و باعشق كل لحظة أمن بتعدي
عرفناها و عرفتنا
و انام و اصحى و ايدي تكون على قلبي
و فيه الخوف و أحلامه و ك الفكر متخبي
ماكنتش عارفة إن هناك ... في ناس تانية
و من دمي
و لازم احس بالهم اللي في قلوبهم
عشان همي
و احس حقيقي بحياتهم
و لحظة سلم فوق بيتهم و لا تعدس
و ليهم أرض منهوبة ...
ماهيش ليهم ... دي برضة زيهم أرضي
و إن الأرض مش راجعة بغنا و مواويل
و لازم تتروي بينا و دم يسيل
صحيح التضحية صعبة
لكن لو كانت الفكرة بتلمس حتة في قلوبنا
هتتحول لحلم جميل
و عشت احلم
و اتمنى
أشوف الفرح بين أهلي
أو المس يوم دمايا تسيل على ترابها
و باب الفرح يفتحلي و يندهلي
كبرت اكتر
و عاش الحلم جوايا أكيد يكبر
و عاش القلب يتجهز و يتحضر
لكن لسة في نني القلب حتة ضعيفة و جبانة
عشان انا برضة إنسانة
و طبع القلب يتغير
بتكسرني
تغيرني
تتوهني في حاجات ياما
و دقة خوف في نبض القلب توصلني
تدخلني في دوامة
و ترجعلي لو امشي في يوم قصاد سور البانوراما ..........
الاشتراك في:
تعليقات الرسالة (Atom)
20 comments:
على فكرة
انا مش حتكلم كتير
هى كلمة واحدة
رائعة وأكثر من ذلك
ولكن لابد أختى من الجهاد حتى نحصل على السلام فلن نشعر به الا اذا ذقنا الآخر
ومن رافق الراحة فارق الراحة
جزاكم الله كل خير
السلم عليكم
رائعة جدا...
وده لاتطور الطبيعي للي احنا بنمر بيه
لكن حضرتك كتبتي فاء بدل القاف في الجملة دي
و رحت بشوف بيملا القلب
أعتقد أن المقصود هو (وحت بشوق) :)
مي
رائعه
صدقا رائعه جدا
أحيانا أتخيل ماذا كنت سأفعل لو كنت أحيا مثلهم
قطعا لن أستطيع
أو ربما
فعلا نحن في نعمه كبيره
حتي اننا نسيناها
دمت مبدعه يا شاعرتي الصغيره
و إن الأرض مش راجعة بغنا و مواويل
و لازم تتروي بينا و دم يسيل
صحيح التضحية صعبة
لكن لو كانت الفكرة بتلمس حتة في قلوبنا
هتتحول لحلم جميل
---------
مفيش كلام بصراحة بعد الكلام ده
ربنا ينصر الإسلام ويعز المسلمين ويردنا الى ديننا ردا جميلا
وفي الموت أيضا حياة
ولا تحسبن الذين قتلوا في سبيل الله أمواتا
ماكنتش عارفة إن هناك ... في ناس تانية
و من دمي
و لازم احس بالهم اللي في قلوبهم
على فكره روعة
عهجبتني جدا جدا جدا
كنت عاوز اعلق مرة قبل كدة لكن البركة في النت
ثانكس
سلام
ماشاء الله تبارك الله
كلمات جميل ومعبرة جدا
وايقاع نغمي عالي المستوى
ومدونة جميلة ورقيقة
ربنا يسعدك
اول مرة اجى هنا من زمان اوى
بقالى فترة طويلة جدا مابدخلش مدونات
الشكل الجديد للمدونة جميل جدا يا دكتر
ولاون كلمة دمايا دي غريبة شوية
بس القصيدة حلوة
..
وشكرا
أو ثانكس زي عياش
..
ما شاء الله
يعنى او لمرة ازورك الاقى قصيدة جامدة كده
مش متعودة انى اكمل البوست او الشعر لآخره لو طويل و مفيهوش شئ يجذبنى
لكن بجد و بدون مجاملة
بعد ما قريت قصيدتك كلها
حسيت انى عايزة أقراها تانى
عن اذنك اقراها تانى
و بجد بحييكى عليها
الله ينور
بس بجد البانوراما فيها ريحة كرامة افتقدنها اليومين دول
ارضي يا ارضي
ياللي ضايعه من زمان
ضيعوكي بالكلام
قطعوكي بالسلام
دفنوا فجرك اللي كان
قتلوا شجرك والامان
عهد من اللي قلبه
مليان بحبك
دمنا راح يروي رملك
لجل يطلع تاني فجرك
بالعمل مش بالكلام
.............
الاخت الكريمه عيله
ربنا يرزقنا ويرزقك الفهم
ماشاء الله كلمات رائعه وفكره جميله
واحساس راقي
راب يرجع يوم نعمل فيه انجاز زي اللي متصور في البانوراما
اتمنى ان نتواصل دائما
الشاعر بن هلال
بسم الله الرحمن الرحيم
أخوكم أبوبكر حمدى
المنصوره
تخطيط عمرانى القاهره
جزاكم الله خيرا على هذه المواهب ونتمنى المزيد
أسألك الدعاء
أخوكم
انا اول مرة اجي هنا
بجد راااااااااائعة ياجنين كلماتها حلوة اوي
ربنا يوفقك يارب :)
لا شي اسمة سلام مشروط يضعنا في خانة اليك كمن يبيع نفطة ل100عام بعد مماتة
ادعوكي لزيارة مدونتي لحن الغروب
واتمني التواصل الدائم بيننا
ماخبيش عليكي
أول مرة أقراها
للدقة أول مرة أقراها كاملة
..
بس برضك نفس التعليق
..
جميلة جداً يا جنين
فكرتيني بالمرة الوحيدة اللى روحت فيها البانوراما
في البداية كنت مبسوطة بس لما لأيت أخويا الصغير بيبكي من الخوف حسيت بنفس إحساسه
كنا بنقوله ماتخافش دي صورة مش حقيقة
بس من جوايا كنت عارفة إن الحقيقة كانت أصعب من الصورة
ربنا ينصر إخواننا في كل مكان
المدونة دي ما شاء الله روعة..
وقفة احترام..
تحياتي
حابيييييييييييييين نشوف الاخبار والمشاركات الجديدة !
الله معكم .. اتمنى عرض الجديد بأستمرار
إرسال تعليق