إلى كل مواطن اتسحل في المظاهرات أو اتعذب في الاقسام او اتبهدل في السجون
إلى كل مواطن اتسحل في المظاهرات أو اتبهدل في اقسام البوليس او امن الدولة ظبطوله الفولت عشان ينور ...
ليه يا ابني كدة بس ؟؟
كدة تعمل في نفسك كدة ؟؟
انا عايزة اسـألك سؤال بس ترد علية بصراحة
ماسمعتش مامتك و لا باباك و هما بيقولوا قبل كدة : ابعد عن القدشايا لا تروح في الحديد يا دشينايا !!!
ماسمعتش كلام بابا و ماما ليه ؟؟
ليه ؟؟
ليه ؟؟
ادي اخرة اللي مابيسمعش كلام بابا و ماما .. و مابيشربش اللبن ابو زهرة و اسمنت قبل ما ينام ... و مابيبصش يمين و شمال قبل ما يتنطط وسط العربيات !!
و بعدين انا عايزة اسأل سؤال كمان معلش استحملني
ايه الفضا ده ؟؟
لا بجد ...
خلاص بقيت فاضي مش وراك حاجة غير التفكير في البلد و حال البلد و مستقبل البلد و الناس المتبهدلين في البلد !!!
إيه ده يا ابني ...
معندكش شغل ؟؟
مش بتتشعلق في الاتوبيسات كل يوم ؟؟
مش بتتخانق مع الناس في طابور العيش ؟؟
يلا يا ابني قوم ... روح هات لعيالك جبنة مسمومة و خضار متسرطن و عيش بالمسامير عشان يلحقوا بكرة يروحوا المدرسة ام 60 طالب في الفصل ... امال يروحوا على لحم بطنهم يعني ؟؟
إيه ؟؟
بتقول إيه ؟؟
مش متجوز ؟؟
طب ما تروح تشوفلك شغلانة يا بني بدل ما انت قاعد كدة ؟؟
و بعدين عايزة اقولك على حاجة ... طول ما انت ماشي في السكة دي امن الدولة حيعلم عليك و ابقى قابلني لو لقيت حد يشغلك !!!
و بعدين تيجوا تشتكوا من البطالة البطالة ... و انتوا قاعدين و لا بتتحركوا !!! حاجة غريبة يا اخي !!!
إيه ؟؟
لسة طالب ؟؟
طب ما تروح تصم لك كلمتين يا بني عشان تدلقهم في ورقة الامتحان ؟؟ شكلك كدة بتدبلر كل سنة !!
بتطلع من الاوئل ؟؟
و انت فاكر إن ده حينفعك ؟؟
يا بابا لما الامن يحطك في دماغه ابقى قابلني لو شفت تعيين في البلد دي !!!
و بعدين انا عايزة أسألك على حاجة تالتة معلش استحمل رخامتي ما نا صغيرة برضة و عايزة اللي يفهمني
انت فاكر إنك انت فاهم مصلحة البلد اكتر من اللي ببحكموها ؟؟
حاجة غريبة يا اخي
يا سلام يا اخي
انت ماسمعتش الجملة اللي في الصميم اللي قالتها المواطنة المصرية بجد ساعة التعديلات : هو الريس حيعملنا حاجة وحشة يعني ؟؟؟
ده انت غريب يا هاني !!!
انت حتفهم احسن م الحكومة ؟؟
الحكومة عايزة مصلحتك يا ابني
هية تعرف مصلحتك اكبر منك
لما تموت الشعب في العبارات و القطارات و السيارات و غيرها من وسائل المواصلات
فده عشان مصلحتك
لما تسرطن الاكل و تخصص العلاج
فده عشان مصلحتك
لما ترمي اللي زيك في المعتقلات و ما يفرقش معاها إن يبانلهم اصحاب و لا لأ
فده أكيد برضة عشان مصلحتك
امال حيكون عشان مصلحة مين يعني ؟؟
هي وراها غيرك ...؟؟
بصي يا ابني انا قلت لك اللي عندي ...
و بصراحة لسة مش فاهمة انت بتعمل كدة ليه ؟؟
ماتقولي يمكن افهم ؟؟
الاشتراك في:
تعليقات الرسالة (Atom)
11 comments:
:):) يا ستي اعتبرينا عيال و بنغلط !!!
أن أن أن !!!
احنا بنخبط : D
بس حاقولك على حاجة يا مريومة
ده بيثبت لنا حاجة تانية
بما إن احنا عيال و بنغلط فالحكومة بتعاملنا معاملة الام
هي بتعذبنا و تسحلنا و تبهدلنا من باب تأديب الأم لأولادها
شفتي انها طلعت في الاخر عايزة مصلحتنا برضة ؟؟
ام اية
هو فى امهات كدة
فى امهات بتخاف على ولادها كدة
منش مخلينا نفسنا فى حاجة
وسرطان وخدنا
لبن بايظ وشربنا
عصيان مقشات ولبسنا
دة احنا بقينا طماعين اوى
ده على كده الأم مبقتش مدرسة !!! و لا حتى حصلت غرزة !!!
ياريتها كانت اتوئدت زي ما كان الكفار زمان بيوئدوا البنات !!!
اقولك على حاجة لذيذة, تقدري تقولي خيال علمي...بس خلينل نتخيل سوا:
تيجي نغير أمنا الغولة دي؟؟؟ و نجيب بدلها حد تاني؟؟
متسألينيش ازاي؟؟ و امتى؟؟
لأن ده خيال علمي و مباح فيه كل حاجة !!!
بس و الله ممكن يتحقق !! ليه لأ؟؟؟
بس ماظونش اني هعيش لغاية ما شوف اليوم ده...حسى لسة بدري عليه...
مش فاهم حاجة
عشان تعرف إن احنا مش بنشيل جميل الست الغلبانة اللي شقيانة علينا
تعمل لنا ايه اكتر من كدة ؟؟
عملت لنا حاجات مش موجودة في العالم كله !!!
لأ و نيجي احنا برضة نعمل دوشة و مانسمعش الكلام و نوجع دماغ الست !!!
يبقى محتاجين نتربى بقى و لا ايه ؟؟؟
مريومة
عايزة تتبري من مامتك !!!
تؤ تؤ تؤ
ماكنش العشم
بعد العمر ده يا مريم
قوليلي حارماكي من ايه هية عشان تقولي كدة ؟؟
بس تفتكري الخيال العلمي ده ممكن يتحقق بجد يا مريم ؟؟
بجد يا مريم انا الفترة الاخيرة فعلاً بدأت احس إن مفيش امل
كنا بنقول لو الراس الكبيرة مشيت كل شيء حيتصلح
إنما أنا خايفة نطلع في الاخر بنحلم
و نرجع في الاخر نقول فين ايام العهد المباركي !!!
تصدقى انا كمان مش فاهمة شعب نمرود صحيح
مدونتك تحفة و انتظرينى عندك كتيير
تسجيل متابعة
el sho3or da 3andena kolena ya gameel..msh 3andek ente bas.....
ana el e7bat ba2a 3andi 24\7 l2ene beyge fe dam3'i nafs ele ente 2olteeh we 7assa beeh...
bas barga3 we a2ol tool ma7na 3ayshen we lesa feen asoot ne2ol la2a tool mafi amal isa...
akeed wegodna we3terdna da bey3mel 7aga...ai 7aga....
we akeed bardo wgodna leeh sabab fel 7ayah...ya3ni msh ma5lo2en kda ya3ni...
we sada2ni i dun think abdan en e7na han2ol feen ayam el 3asr el mubaraki...le2no youm mayhseeb el balad, haykoun 5ad kol 7aga menha we masbsh feeha 7aga....zai maby2olo ya3ni 5adha la7m we ramaha 3a9'm...
we 3an el 5ayal el 3elmi: ya 3alim !!!! :):):):):)
صحيح عندك حق احنا ليه بندخل نفسنا فى الكلام ده هو فيه اب هيموت اولاده لا بيقسو عليهم بس عشان مصلحتهم هما بيعملو كده خوفا علينا من امريكا الوحشة بس بس لو عليهم كانوا يحققوا لينا امانينا كلها ربنا يخليهم لينا يا رب لغاية ما نتشل
بصي يا قمر هو في البداية كان عندي حب استطلاع وعاوز اعرف ايه الناس اللي بيعملوا مظاهرات دول وبيعملوها ليه وايه هدفهم منها المهم بعد المتابعة والملاحظة وخلافه لاقتني مصدق كل اللي بيتعمل وبعدين لقيت عواطفي واحاسيسي بتدفعني دفع نحو الانخراط في العمل السياسي فانضميت ويا ريتني ما انضميت مش عشان الكهرباء والضرب والسحل لا عشان مش كل الناس اللي دخلت كانت مصدقة ومش كلهم وطنيين وبيخافوا ع الوطن او مش هو ده اللي مدخلهم بصي هتلاقي ناس جاوية شهرة والسياسة هي اللي تشهرها وناس عاوزة تعمل زعما وناس بدور ع مصالحها مش معني كلامي انهم كلهم كده لا فيه عملة جيدة وعملة سيئة بتطرد الجيدة بصيت لاقيت كل يوم العدد بيقل ومين الليبيمشي ومش راضي يرجع الناس المحترمين وفضل كل السيئين ومعاهمناس مصدقين في النضال وناس فاهمه كل حاجة بس مصرة انها تقوم بدورها بالرغم من الوساخة اللي حواليها وخلي بالك انهم مبيسلموش من اللط من الوسخين لان الحجر الداير لابد من لطه اما عن ايه اللي يخلي الواحدكان مستحمل ضرب وسحل المظاهرات بصراة ان اختياري كان العمل السياسي واني نازل المظاهرة فلازماتحمل نتيجةاختياراتي بالبلدي اللي عاوز الدح ما بيقولش اح وحكاية الاعتقال بتبقي في الحسبان اما كلام اهلك فاللي عاوز يعمل حاجة مابيهموش حد ومحدش بيقف امام خياراته وهيجد اساليبه الخاصة اما بالاقناع واما بطرق اخري من تجاهل اوعدم تصريحبما يفعله او خلافه
ما علينا
ماما دايماً تقول كدة !!!
منتظراكم كني كتييير
حنتكلم
منتظرين متابعتك
مريم
اه يا بنتي و اه و اه
تصدقي يا مريم
نا فكرت برضة
يا ترى لو حتى حد كويس جه بعد بابا حسني
حيلاقي حاجة يصلح فيها اصلاً ؟؟
ده حيبقى عايز معجزة !!!
امام الجيل
و احنا لسة حنتشل ؟؟
ما الشباب خلاص اتشل و اتعل و جاتله كل امراض الدنيا
ربنا يكرمك بلاش الدعاء احسن يستجاب !!!
سعد
لأ الرد ده عايز روقان كدة و مخمخة
حارجع تاني لما دماغي تبقى احسن إن شاء الله
إرسال تعليق