چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

((( عن الذين رحلوا ... و هدموا البيت )))




تخيل انك ساكن في بيت ... من الطفولة ...

يوم بعد يوم بتكبر في البيت ده ... يوم بعد يوم بترتبط أكتر بالمنطقة و الناس و الجيران

بقى ليك ذكرى في كل مكان فيه ... في كل شخبطة شخبطتها على الحيطان ... في كل كلمة قلتها مع حد من الجيران

شكله ... لونه ... حيطانه .... يوم بعد يوم كل الحاجات دي بقت محفورة جوة شخصيتك ....


تخيل لما تصحى في يوم ... تلاقي جيرانك اللي جنبكم مشيوا و سابوا البيت ...


ايه ده ... من غير أي انذار كدة ؟؟

طب يقولوا ؟؟

طب يدونا عنوانهم الجديد ؟؟

شوية و اكتشفت انهم ماشيوش بس .... لأ ... دول هدوا البيت كمان !!!


ليه ؟؟


بيتهم و هما حرين فيه ؟؟

يعني هما هيبيعوه مثلاً ؟؟

لأ ... بس مش عايزينه يبقى موجود ....


ازاي ؟؟ !!

طب لو مش عليهم هما ... علينا احنا ....

شارعنا اللي شكله هيتغير .... كل ذكرى كانت لينا فيه .... كل ده ... خلاص كدة ؟؟

الاغرب و الأغرب .... لما تلاقي جيرانكم التانيين كمان عملوا كدة ... و اللي جنبهم ... و اللي جنبهم ....


فيه ايه !!


كدة و من غير سابق إنذار


ساعتها انت هيكون وضعك ايه ؟؟ و شايف ايه ؟؟




























































ايوة ... عليك نور ....


ده بالظبط اللي باحسه لما الاقي حد قفل مدونته من غير سابق إنذار ....


فيه ايه يا جماعة ؟؟ ليه كدة ؟؟

لو فيه مشكلة ممكن تتحل .... لو فيه انشغال ممكن تسيبوا الأمر لوقت فراغ و لما تفضوا تبقوا ترجعوا تكتبوا تاني ...

إنما ازاي تمشوا و تهدوا البيت ؟؟

عايزة اقول بس ... إن أي مدونة دخلتها و اتسجلت رقم في عداد الزوار ... يبقى انا لية فيها

اي مدونة علقت فيها و لو بحرف ... يبقى لية فيها

أي صورة او تصميم أو حملة اتشاركنا فيها ... يبقى كلنا لينا فيها عند أي حد فينا


مش من حق حد يمشي و ياخد ذكرياتي ....


يمكن الناس تشوف دي عاطفية زيادة عن اللزوم .... بس ده واقع ....


يمكن مش كل اللي بيكتب بيبقى متوقع إنه بيسيب تأثير .... بس أكيد كل واحد فينا بيأثر و لو بواحد من عشرة في المية في أي واحد من الناس اللي بتقرا

ساعتها يبقى فعلاً مش من حقه ... لأنه لو كدة يبقى مش هيفهم عمره الأثر اللي هو سابه باللي عمله ...


فقط ... فليجدد كل منا نيته فيما يعمل ... و ليراجع نفسه ....

بس ....... !




55 comments:

صاحب المضيفة يقول...

والله عندك حق


في ناس كتير بتكون عاوزة تقفل المدونة بأي شكل وخلاص


أحلى ما في البوست .... اخره


ربنا يكرمك ويعزك


تحياتي

غير معرف يقول...

اكيد ما تقصدنيش

علشان معاكي الباسورد و تقدري تسترجعي ذكرياتك ف اي وقت ^_^

بس هو مين قفل ايه ؟؟

ننن

belal يقول...

انا مع حضرتك في كل اللي كاتباه
وقبل كده لما أخ ..ساب التدوين
علقتله ..بنفس المعنى
وأعلنت عن اعتصامي في الشات بوكس لحد ما يرجع..

بعيدا عن ذلك

ما الحل إذا كان بعض الناس
تصيبهم مدوناتهم بضيق التنفس
مجرد وجودها يتسسب لهم بضيق في التنفس
لو هما شايفنها مدونة مالهاش لزمة
وهما شايفين إنهم ماكتبوش حاجة مهمة
أكيد فيه ناس ممكن تختلف معاهم في قيمة ما كتبوه..لكن أليس لهم الحق في الحكم على أنفسهم أيضا ..نفترض أنهم dرونها تجربة فاشلة جدا ..عندما يرونها تذكرهم بالفشل ..

ما الحل برأيك ؟؟؟

SOLITUDE® يقول...

طيب ممكن أطلب طلب؟؟
ما تكتبي المواضيع بتاعت "هنا أكتب ما يبدو وما لا يبدو" هنا
ايه المانع؟؟!!!

عصفور المدينة يقول...

ربنا يبارك فيك

أنا مبسوط إني باقرا الكلام ده لك إنت بالذات

Fahd يقول...

وانا كمان بقول كده

مش من حق اي حد يهدم بيته ويهدم الذكريات والبصمات التي تركها داخلنا


انا بحس اننا عيلة واحده حتي ولو اختلفنا في الافكار

يوم كا تقابلنا في عمر بوك انا كنت بروح لكل واحد واساله انت مدون واتعرف عليه وعلي مدونته وكنت سعيد جدا


كويس ان بتفكري الناس

وبتدقي ناقوس الخطر في عالم النسيان
والكلام ده

http://kasperb4.blogspot.com/ يقول...

معاكي حق جداا جداا في وجهة نظرك دي
وانا متفق معاكي
انا كمان بحزن لما ازور مدونة كنت بزورها من فترة كبيرة والاقي صاحبها بيقول انه قفلها
ومن ما يذكر أي سبب

من حقه طبعا لأنه حر
بس انا بردو بدايق زيك تمام

المتحرش بها يقول...

والله الموضوع ده فعلا ممكن يكون يضايق لكن انتى متعرفيش ظروف غيرك ايه

safa7_karmooz يقول...

mmmmm

mosh 3aref :s

belal يقول...

أبسطهالك ......حاجة كده زي الشات بوكس :D
..

Mai_Jeneen يقول...

D :

مش الفكرة يا باشمهندس ... انا بس مشغولة اليومين دول شويتين ... ففي حاجات مؤجلة لحد ما الاقي وقت افكر في تنظيمها ... مش للإلغاء في حد ذاته


زي الشات بوكس كدة

غير معرف يقول...

خايفه ع الشات بوكس ليتعدي م الباكتيريا أكيد..!!

قلب الام برضه (بلينك)

مدحت محمد يقول...

انا كان عندى مدونة بعد سنة مسحتها بس بجد ندمت جدا

انى عملت كدة
وهو معاكى حق غلط

مشروع انسان يقول...

عندك حق يا فندم

صحيح المدونة مش بس ملكية شخصية
كل حد مر عليها وتعلق بما فيها
ليه فيها حق

وصعب اننا نتخلى عن الناس
كده بسهولة

ودون سابق انذار

انا لما اسيبها هبقى ازمر قبلها
:)

سمـــر مــاهر يقول...

جميله التدوينه
ومشاعرها حلوه
انا كنت اعتزلت مدونتى فتره بس لقيت نفسى بحنلها

فقلت بلاش احرم الناس من صداعى
:D

ولــــــــــو يقول...

برافو
بجد اقنعتيني
خلاص مش هاقفل مدونتي ان شاء الله
بس مين قالك اصلا اني كنت بافكر ؟

تحياتي

شيماء علي يقول...

إذن فلي عندكِ نصيبٌ ؟

Dr. Rehab Taha Helal يقول...

عندك حق فعلا, اكتر من مدونه كنت بأحبها و بأدخل اشوفها بانتظام لكن اصحابها بطلو يكتبو ..كل مره كنت اخش و الاقيهم سايبين المدونه خالص كده كنت بأزعل .. رغم انى ما اعرفشى حد من المدونين دول شخصيا بس حبيت اسلوبهم و حسيت ان فيهم منى و زعلت لما سابو المدونات ..فعلا عندك حق

فلسطينية الهوى يقول...

جميل التشبيه اوي

في مدونات معينة لو صاحبها حذفها هزعل

اما في تانيين مش هيفرقوا معايا لاني مكنتش متعلقه بيهم


جميل البوست اوي

أحمد عبد الفتاح يقول...

مشكلة المشاكل التى عانيت منها كثيرًا: التعلق بالأشياء أو الأشخاص
وغالبًا ليس لها حل.. أو لم أعرفه حتى الأن

wanna b a physician يقول...

عندك حق بجد
يعنى كان فى اخت مدونة باعتز جدا بيها وفجأة قفلت المدونة بدون انذار حتى انقطعت عن التعليق
وده زعلنى جدا ده مش عاطفية بس ده هو الارتباط بالاماكطن الاشخاص المواقف
وهكذا
تحياتى ليكى

غني يابهيه يقول...

عندك حق طبعا
عشان كده دخلت عندك وعلقت عشان يبقى ليا فى المدونه بتاعتك


تحيات بهيه

mohammed alsha3r يقول...

يااااااااااااااااه

نفس الرجاء والاحساس من كل مدون

عروسة ننوسة يقول...

الله عليك وعلى حبك ووفاءك للاصدقاء....وانا على العموم بضم صوتى لصوتك
تحياتى

انت تسال والكمبيوتر يجيب يقول...

يها المواطنون نذيع عليكم بعد قليل خبرا هاما
مارشات عسكريه مارشات عسكريه مارشات عسكريه
كمان مارشات عسكريه
كفايه كده
ايها المواطنون جاءنا البيان الهام التالى
اذاعت كافة وكالات الأنباء الفضائيه والأرضيه وما تحت الأرض ايضا ان السيد عبده الرايق مرشح للفوز بجائزه تقدر بربع مليون يورو ....متتخدوش اوى كده لأن من شروط الجائزه ان يجيب على سؤال بمدونتنا التى تحوى هى وموقعنا كافة التفاصيل والكل مدعو للأشتراك والفوز باحدى جوائزنا الثيمه
ونرجوا ان تستمعوا الى حلقة برنامجنا الأذاعى الذى به ايضا معلومات مثيره فى هذا الموضوع يوم الأحد 29-6 حيث نكشف كافة الأسرار وراء هذا الموضوع والبرنامج يذاع التاسعه وعشر دقائق صباحا على اذاعة مصر الرئيسيه كما يمكن الأستماع اليه من داخل موقعنا على النت اسرة برنامج انت تسال والكمبيوتر يجيب
والعنواين
المدونه ثم الموقع كالتالى
http://netonradio.blogspot.com

7:52

blue-wave يقول...

يااااااااااااااااة
معقول لسه فيه حد كدا؟
بيحب الناس وبيرتبط بيهم كدا حتى من غير ما يشوفهم ولا يعرفهم؟
تحياتى واعجابى الشديد بجد

AbdElRaHmaN Ayyash يقول...

ههههههههههههههههه
:D كنت فاكر الموضوع يتجه نحو الرومانسية و الصداقة المفقودة
:D لكن طلع عن التدوين
و الله في ناس بتستهبل
في ناس بتحب تغير جو
و في ناس شايفه عبثية ما تفعل !

catroz يقول...

ow,wا لما تكون مدونه انتى متعلقه بيها
وتتقفل فجاه
تحسى ان فى جزء منك اتاخد منك غصب عنك

بس مهما كان منعرفش الظروف ايه

انا بقالى كام يوم و الله بفكر اقفل البلوجايه

.....:(

مصعب الجمال يقول...

دا طبيعة الحياة

الربان يقول...

تحياتي

طبعا هناك ظروف لا نعلمها...لككنا نسأل الله ان يوفق الجميع الي ما يحب و يرضي.

تحياتي و تقديري

عابرة السبيل يقول...

ساعات بتبقى فى ظروف اقوى من ان الواحد يبرر قفل المدونة
اكتئاب ،ياس ،مراجعة زات
اى سبب

لكن اكيد عندك حق اننا كلنا بنزعل لما نلاقى حد قفل مدونته لانها مش بتبقى مجرد صفحة نت بندخلها نقراها وبس

دى فعلا بترطينا ببعض من غير ما نعرف بعض
وبتكون جزء من يومنا ،بتغير فينا كتير

عندك حق انا قابلت الموقف ده اكتر من مرة وكل مرة ببقى بتحايل على صاحبة او صاحب المدونة انه يفتحها ولو حتى يسيبها كده من غير كلام جديد بس يسيبها

أميرة محمد محمد محمد يقول...

جمييييييييييييييييييييييييييييل جدا
يا مي نقلت الاحساس بالظبط
ربنا يكرمك
ياقمر

An Author يقول...

قفلت مدونتى رسميًا مرتين و هجرتها مرات..
مش عارفة ،بس ساعتها كنت حاسة انى فعلا محتاجة اقفلها او ابعد عنها لاسباب مختلفة
ورغم كدة كنت بزورها لما ياخدنى الحنين من وقت للتانى كأنها اطلال بيت قديم..

نييجى للناحية التانية ،لما حد يقرر انه يبطل يكتب او يقفل مدونته ،بيتملكنى شعور غبييييييي كأنى فقدت عزيز لما اجى ادخل والاقى ان المدونة دى بقت للمدعويين بس او بوست ختامى في استودعكم الله و اشوف وشكم بخير..

مع ان المفروض ان دى حاجة ما تخصناش واننا لا نملك اى شىء تجاه ما يحدث بس تقولى ايه..

طبع بشر عاطفيين :)

Dr Gad يقول...

من اكتر الحاجات اللي بتضايقني وحصلت لما لقيت مدونه ريري اتقفلت بجد زعلت جداااااااا


ربنا يصبرنا علي فراق المدونين الاعزاء :(

shabfa2re يقول...

للأسف ناس كتير مش فارقة معاها
وناس قليلة اوى اللى بتحس
وعندها الوفاء ده

حسن حنفى يقول...

اسف علي التاخير
بس معاكي حق في كل كلمه قولتيها
تقبلي مروري

عروسة ننوسة يقول...

بجد انتى هايلة ايه البوست ده وكمان ربطك وتشبيهك للجيران بالمدونين برافو......مشاعرك نبيله بجد
تحياتى

خالد كامل يقول...

دا نفس احساسى بجد
اننا كلنا عيلة واحدة
أو جيران زى ما فلتى
.
.
.
.
.
تحياتى

Princesa ... WHiSPeR يقول...

عندك حق يا جنين فى كل كلمة
و هى مش عاطفية زيادة عن اللزوم


بس بصيلها من الناجية التانيه
انا عن نفسى بعتبر مدونتى دى بيتى الاول اللى باخد فيه راحتى على الاخر
الوانها الالوان اللى بحبها وبس
فيها الميوزك اللى بحبها وبس
كل حاجه بتتكتب فيها بتبقى على مزاجى انا
وبردو كل المدونات اللى بدخلها بعاملها زى بيت صحابى اللى دخلت فيه وعشت فيه
وكل كومنت بحطه بيكون بمسابه العيش والملح اللى اكلته مع صاحب البيت ده
بس انا جت عليا فتره طويله اوى وقفلت المدونه بتاعتى
وقبل المدونه دى مسحت مدونتين تانيين
وكانت ظروف ماينفعش فيها اسيب اثر ليا
ومن ساعة ماعشت انا التجربة دى
مابقتش ازعل من اى حد يقفل مدونته
انتى ماتعرفيش هم قفلوها ليه

عروس البحر يقول...

عنك حق فعلا
تحياتي

AbdElRaHmaN Ayyash يقول...

طيب الاي تريبل اي ده يوم المهندس
:D
مين اللي لازم يحضره ؟؟؟

Mkjwe يقول...

كلامك جميل والعنوان اجمل
وصح فعلاً شعور غريب ومؤلم لما تحسي ان حد قفل مدونتك بدون سابق أنذار ... بس أكيد بيكون لظروف قوية بتخليه يقفلها بدون أنذار ولا حتة يبلغ متابعي المدونة بهذه الخطوة ... وفقك الله
تقبلي تحياتي

أحمد عبد الفتاح يقول...

حلو أوي التشبيه ده على فكرة

قررت أكون عانس يقول...

ما جربتش احساس ان مدون تقفل

بس جربت احساس ان بوست يتمسح بالتعليقلات اللى فيه

حاجة تتضايق فما بالك بمدونة كاملة تقفل

Unknown يقول...

ممكن يكونوا هم باصين ليها من ناحه تانيه يا جنين
مش شرط انك تبصى للموضوع من زاويه واحده بس
اكيد بردو بيبقى فى اسباب
وبعدين هو لو حد مش عايز بيته ومش عايز جيرانه وعايز يروح مكان تانى بعيد تفتكرى هتقدرى توقفيه ؟

غير معرف يقول...

اللى عايز يعلق يروح فين

الحمد لله وصلت
ادينى جيت بيتك اهو يا ستى
اعملى لى نسكافيه بقه ولا حتى كوباية شاى

E. Fekry يقول...

كلامك لمسني جدًا جنين
حقًا معبر جدًا
أتذكر جملة قيلت لي من قبل عندما اغلقت المدونة تحمل نفس المعني الذي تعبري عنه هنا

" المدونة دي ليا فيها كتير"
عندها لم اقدر معني تلك الجملة جيدًاولكن فعلًا نحن متي سطرنا حروفا لتخرج كلمات لتعبر عن جزء منا باتت ملك الآخرين .

شكرًا لك ومدونتك جميلة
تقبلي مروري
: )

Übersiedlung يقول...

اللهم ولى من يصلج

Privatumzug Wien يقول...

:(

Umzugsunternehmen Wien يقول...

جددوا موضوعتكم .. رجاءاً :)

Bauschuttentsorgung Wien يقول...

الجديد .. الجديد .. الموضوعات الجديد فين ؟؟

Transport Wien يقول...

الله يوفقكم..ع المجهود...:)

Umzug nach Luxemburg يقول...

الله يعينكم على المجهوووووووووووووود :)

Lagerung يقول...

Allah is with you ... :)

Hausräumung Wien يقول...

تحياتى لكم .. فين الموضوعات الجديدة