چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

باسبور امريكاني





في البداية

ملحوظة هامة :

جميع أحداث هذا البوست حقيقية و نقلت لي بالتواتر عن أشخاص ثقة جداً ... و لا مانع من بعض الحبشتاكانات و البهارات في الالفاظ كعادة الكثير من أفراد الشعب ...

المكان :
أمام وزارة الداخلية مباشرة ... القاهرة ... جمهورية مصر العربية

الزمان :
نهار يوم الاربعاء الماضي

الحدث :

واحد واقف و معاه مراته و عياله و عمالة يافطة بانر كبيرة مراته مسكاها من ناحية و العيال ماسكين من الناحية التانية
اليافطة مكتوب عليها ( وزارة الداخلية يا بلطجية يا تيييييييييييت يا اللي حاكمين البلد تييييييييييت و انتوا و الوزير البلطجي التتييييييييييييت )
طبعاً واضح إن العبارة بتصرف ... مش فاكراها قوي .... بس اكيد المعنى وصل يعني ...

الراجل واقف في وسط البانر و عمال يسب و يتشم بألفاظ حقيرة جداً ... و يا تييييت ... يا ولاد تييييت و خلوا التيييييت يطلعلي ...


طبعاً المشهد يخليك تستغرب ... الشعب دبت فيه الروح يا جدعان ...

بس الاستغراب حيروح بقى لما تعرف اللي كان ماسكه في ايده ... باسبور امريكاني ...

اه عشان كدة ... بيقول و يعمل ما بداله ... و قصاد وزارة الداخلية مباشرة ....

طبعاً كان واضح جداً إن الراجل ليه مشكلة مع الناس اللي جوة ....

شوية و نزله شوية لواءات على عمدان على رتب تانية ( مابفهمش فيهم الصراحة ) و قاعدين يكلموا الراجل
يا عمي يهديك يرضيك ... طب خد ولادك و روح ... طب عايز ايه و احنا نعملهولك ... شوية شوية كان ناقص يقوموا يبوسوا راسه ...

و الراجل ابداً ... انتوا يا تيييييت يا مش عارف ايه ... و لازم التيييييت اللي جوة ده يسمعني ... انت فاكرني خايف منك ؟
قاله يا عمي لا انت خايف مني و لا انا خايف منك ؟
قاله انت مش خايف مني !!!
طب انا حاوريك و حاوريكم يا تييييت تييييت تيييت

و استمرت الوصلة ...

و الناس بتوع الداخلية بقى وقعوا في حيص بيص ... و مابقوش عارفين يعملوا ايه و لا يسكتوا الراجل ازاي ...
المهم في خضم المشهد ( حلوة خضم دي ) كان بدأ ناس يتجمعوا و يتفرجوا بقى ... و زغرطي ياللي مانتيش غرمانة ....

راح جيه واحد من الداخلية رايح لواحد منهم و بيقوله حضرتك واقف هنا بتعمل ايه ؟؟
قالوا انا باعمل حاجة في العربية
قاله طب روح اعملها بعيد عن هنا
راح الراجل قايله انت مش قادر عليه جي تتشطر علية انا !!!

حلاوتك يا داخلية ....


المهم المشهد كان يجب ان يكون له نهاية ... قبل ما حد كدة و لا كدة يطلع كاميرا و لا موبايل .. و انتوا عارفين احنا مانحبش الفضايح ... نتشتم اه بس في الدرا ...

و هنا رفعت الداخلية شعارها المعهود

البلطجة هي الحل !!!

راحوا جابوا شوية مخبرين على حبة ناس تبعهم لابسين مدني و راحوا جم عملوا كأن فيه خناقة جنب الحتة اللي واقف فيها الراجل و بعدين الخناقة بدأت توسع توسع و هوب خدت الراجل باليافطة جواها و طاخ طيخ طوخ و بعدين اتحركت الخناقة بعد ما سابت الراجل من غير يافطة و معاه قلم على وشه ...

استمر الراجل في الصراخ و انا حوريكم يا تييييت و التييييت اللي ضربني بالقلم أنا حجيبه و حاوريه ...


كنتم مع فاصل من مسرحية هزلية ....

و عمار يا مصر

14 comments:

belal يقول...

لا يسعنا هنا إلا نحيي طريقة الداخلية الذكية ..اهوا الراجل ضربوه في الآخر

...
اه معلش حضرتك ممكن تقولي الإسم الأول من اسم حضرتك أو أي اسم مستعار لإنه مش معقول لما آجي أرد على حضرتك أنادي باسم المدونة
....

Unknown يقول...

ههههههههههههههههههه
ذكااااء مصرى خرااااافى

لا بجد حلوة
واكتر حاجة عجبتنى حكاية التييييييت دى
هههههههههههههههههههههه

سلام يا قمر
D:

ولــــــــــو يقول...

والله كتر خيرهم
ف الاول والاخر الراجل ده مصري سواء معاه باسبور امريكاني او معاه ثانويه عامه والمصري هنا لازم يضرب بغض النظر عن الوسيله بس برضه هايضرب
ياجماعه هي دي المساواه
منهم لله ولاد التييييييييت
ياجماعه الناس دي بقت تتلذذ بالضرب
دول مش بني ادميين دول ولاد تييييييت

حزيــــــــــــــــــن يقول...

انا اول مره اجى عندك
كنت ميت من الضحك على حكاية تيييييييييييت دى
بس يا ريت تشيلى الورد فاريفايكيشن
عشان بتزهق الواحد
اتمنى تزورينى
mazaag.blogspot.com

Alaa يقول...

البلد اللي الغرب يتعاملوا فيها احسن من اصحاب البلد عمرها ما هتشوف خير ابدا

عجبتني أوي لواءات و عمدان
دول كانوا عمدان نور و لا كهربا :)

البلد دب هتفضل كده
بس مش معنى كده اليأس
لا ده دافع اكبر لحركتنا و تعلية صوتنا

تحياتي لكي يا مخرجة المسرحية :)
ملحوظة :
ايه لازمة ال word verification
بأأأأأأأأأأأأه
الحاجات دي بتغيظني
:)
سلام

Dr.khaled يقول...

تييييييييت
تييييييييت
تت تيت

مشروع انسان يقول...

يعنى اذا سابوا الراجل لانه معاه باسبور امريكانى نزعل واذا ضربوه برضه نزعل احنا ميعجبناش حاجة هههههههه لازم يوروه هو فين عشان ميفتكرش نفسه فى امريكا وحقوق الانسان والكلام ده عشان بس يشتاق لبلده حتى فى الغربة ويفتكرها ولو بقلم

ياسر سليم يقول...

هههههههههههههههههههههه
هههههههههههههههه
اهوه ده بقه الهم اللى يضحك

بقه بالذمة فى اذكى من وزارة الداخلية بتاعتنا

هما ما حطوش ايديهم ولا عملوا اى حاجه ..

كل حاجه اتحلت لوحدها ..

جهاد خالد يقول...

هنقول ايه غير
عمــــار يا مصر


مشهد من مشاهد متعددة لا تبعث الا على الحزن

شكرا ليكي

Mai_Jeneen يقول...

belal

طبعاً وزارة الداخلية الذكية تتبع الحكومة الذكية ... و ابقوا سلمولي على ذكية

قولولي ( چـِنين )


أنا كتبته على جنب في المدونة
ده اسم مستعار طبعاً ... ياريت اسمي الحقيقي كان كدة ...

إنسانة

أمال لو امتعلمناش الذكاء من الحكومة بتاعتنا حنتعلمه منين ... و لا نبقى زي القرع يمد لبرة !!!

و تييييييييت دي عشان الرقابة

:D

Mai_Jeneen يقول...

ولو

ضحكتيني جامد
ربنا يكرمك و يكرمنا
صحيح
مش النيل روانا و الدودة جوانا .. يبقى لازم ناخد على قفانا

بس بلاش شتيمة الله يكرمك ... انا ماليش دعوة هو اللي كان بيشتم مش انا :D




------------------------

حزين

إن شاء الله ماتبقاش اخر مرة ...

بس انا سمعت إنك قفلت المدونة ... ليه كدة بس ؟؟

حاروح هناك اشوف إيه الحكاية

أنا مكانتش فاهمة ايه البتاعة دي بس لما قريت رد الباشمهندس علاء فهمت

ماكنتش واخدة بالي انها معمولة ...
تقريبا كنت حاطاها عشان ارخم ع الناس و انا بامتحن ... هي هي هي .. اشمعنى انا يعني

Mai_Jeneen يقول...

الباشمهندس علاء

أنا كنت دايماً باقول لماما إني أول حاجة حاعملها لما امسك الرئاسة ( و لا انتوا عندكوا شك في كدة ) اني حالغي وزارة السياحة دي

عشان لما يجي علينا اليوم لما اي واحد من اوروبا و الدول المتقدم زي ما بيقولوا يكون بياخد على قفاه في بلدهم و يجي يتعامل هنا زي ما يكون جايب الديب من ديله يبقى عليه العوض ... ماجبتلناش غير الهم الوزارة دي ...

و يبقى أول سؤال في أي حادثة ... فيها اجانب ؟؟ و يا سالم لو سايح صباعه اتعور و لا حاجة ... تلاقي الجرايد كلها منزلة مناشير ... طب ما الناس بتموت كل يوم في المستشفيات و القطورات و على الطرق و و و و

كانت امي تقولي طب ما تصلحيها احسن و تعملي حاجات كويسة ... إنما أنا لأ ... تغور بخيره و شرها ... الباب اللي يجيلك منه الريح !!!

يلا خلينا ساكتة احسن لو فتحت مش حاسكت النهاردة

شلتها خلاص


-----------------------

الضاكتور خالد

ماتقطعش الزيارة

بس بلاش شتيمة الله يكرمك

Mai_Jeneen يقول...

إمام الجيل

ضحكتني و أنا ماليش نفس

لازم ياخد خم المصرنة الأزلي

مادام جيت

لازم تشرب !!!

--------------------
الأستاذ ياسر سليم

كله عندنا توموتيكي توموتيكي

أمال ايه

تحياتي

Mai_Jeneen يقول...

النجمة الصاعدة
العفو
:D
و لسة ...

و لكن .. عندي أمل ...