چـِنين .... عيلة و عايزة افهم

((( و كلما ازددتُ علماً ... ازددتُ علماً بجهلي )))

مخنوقة قوي


مخنوقة قوي

قوي قوي بجد

خلاص

مابقتش عارفة

فاضل ايه حلو في البلد دي نفضل عشانه ؟؟

يا ريتني حتى عارفة اعمل رد مبهج زي نوارة

مش شايفة اي حاجة ممكن تكون مبهجة في الظروف اللي احنا فيها دي

صاحبتي كانت بتقولي إن كويس إن احنا جينا في العصر ده ماجناش في عصفيه البلد متصلحة جاهز
عشان يبقى عندنا قضية و حاجة نشتغل عشانها

بس انا مش عارفة حنصلح ازاي اصلاً

كل حاجة في البلد بتزودني احباط على احباط

حتى الحاجات الصغيرة اللي كانت بتبسطني مابقتش بتعمل تأثير

الحل الوحيد
اني ادفن نفسي في الشغل دلوقتي

يمكن انسى شوية

يمكن !!!

إلى كل مواطن اتسحل في المظاهرات أو اتعذب في الاقسام او اتبهدل في السجون





إلى كل مواطن اتسحل في المظاهرات أو اتبهدل في اقسام البوليس او امن الدولة ظبطوله الفولت عشان ينور ...

ليه يا ابني كدة بس ؟؟

كدة تعمل في نفسك كدة ؟؟

انا عايزة اسـألك سؤال بس ترد علية بصراحة

ماسمعتش مامتك و لا باباك و هما بيقولوا قبل كدة : ابعد عن القدشايا لا تروح في الحديد يا دشينايا !!!

ماسمعتش كلام بابا و ماما ليه ؟؟
ليه ؟؟
ليه ؟؟

ادي اخرة اللي مابيسمعش كلام بابا و ماما .. و مابيشربش اللبن ابو زهرة و اسمنت قبل ما ينام ... و مابيبصش يمين و شمال قبل ما يتنطط وسط العربيات !!

و بعدين انا عايزة اسأل سؤال كمان معلش استحملني

ايه الفضا ده ؟؟

لا بجد ...

خلاص بقيت فاضي مش وراك حاجة غير التفكير في البلد و حال البلد و مستقبل البلد و الناس المتبهدلين في البلد !!!

إيه ده يا ابني ...

معندكش شغل ؟؟
مش بتتشعلق في الاتوبيسات كل يوم ؟؟
مش بتتخانق مع الناس في طابور العيش ؟؟

يلا يا ابني قوم ... روح هات لعيالك جبنة مسمومة و خضار متسرطن و عيش بالمسامير عشان يلحقوا بكرة يروحوا المدرسة ام 60 طالب في الفصل ... امال يروحوا على لحم بطنهم يعني ؟؟

إيه ؟؟

بتقول إيه ؟؟

مش متجوز ؟؟

طب ما تروح تشوفلك شغلانة يا بني بدل ما انت قاعد كدة ؟؟
و بعدين عايزة اقولك على حاجة ... طول ما انت ماشي في السكة دي امن الدولة حيعلم عليك و ابقى قابلني لو لقيت حد يشغلك !!!
و بعدين تيجوا تشتكوا من البطالة البطالة ... و انتوا قاعدين و لا بتتحركوا !!! حاجة غريبة يا اخي !!!

إيه ؟؟

لسة طالب ؟؟

طب ما تروح تصم لك كلمتين يا بني عشان تدلقهم في ورقة الامتحان ؟؟ شكلك كدة بتدبلر كل سنة !!
بتطلع من الاوئل ؟؟
و انت فاكر إن ده حينفعك ؟؟
يا بابا لما الامن يحطك في دماغه ابقى قابلني لو شفت تعيين في البلد دي !!!


و بعدين انا عايزة أسألك على حاجة تالتة معلش استحمل رخامتي ما نا صغيرة برضة و عايزة اللي يفهمني

انت فاكر إنك انت فاهم مصلحة البلد اكتر من اللي ببحكموها ؟؟

حاجة غريبة يا اخي

يا سلام يا اخي

انت ماسمعتش الجملة اللي في الصميم اللي قالتها المواطنة المصرية بجد ساعة التعديلات : هو الريس حيعملنا حاجة وحشة يعني ؟؟؟

ده انت غريب يا هاني !!!

انت حتفهم احسن م الحكومة ؟؟

الحكومة عايزة مصلحتك يا ابني

هية تعرف مصلحتك اكبر منك

لما تموت الشعب في العبارات و القطارات و السيارات و غيرها من وسائل المواصلات
فده عشان مصلحتك
لما تسرطن الاكل و تخصص العلاج
فده عشان مصلحتك
لما ترمي اللي زيك في المعتقلات و ما يفرقش معاها إن يبانلهم اصحاب و لا لأ
فده أكيد برضة عشان مصلحتك

امال حيكون عشان مصلحة مين يعني ؟؟
هي وراها غيرك ...؟؟

بصي يا ابني انا قلت لك اللي عندي ...

و بصراحة لسة مش فاهمة انت بتعمل كدة ليه ؟؟
ماتقولي يمكن افهم ؟؟

عيلة و عايزة افهم





لما تحس ان الدنيا حواليك بتتغير بسرعة انت مش فاهمها

لما كل يوم تكتشف إن اللي انت كنت عارفة طلع مش حقيقي

لما تلاقي حاجات بتحصل مش فاهم تفسيرها

يبقى أكيد فيه حاجات محتاجة تتفهم !!!

عشان كدة قلت ان انا محتاجة اكتب

عشان ادورعلى حد يفهمني

فعلاً عيلة و عايزة افهم

فيها حاجة دي ؟؟